【阿碌開咪】懵到上心口的冤案

　上周四本報法庭版有一段非常重要的新聞，雖然細細段不起眼，但已震動整個司法系統，成為法律界大笑柄。

　　標題：《販毒判囚23年，青年上訴得直》，案情涉及律政署、法官、陪審團及海關不尋常地出錯而導致冤案。

　　法庭判詞一出，當日下午，我已收到香港某名牌大狀電話：「碌Sir，呢單野離晒大譜，真好奇睇睇點埋尾，因手尾有一大籮！」

　　小弟好奇心爆發，立即走訪幾位老友大狀，綜合案情，發覺好多都話：「嘩！點解咁都得？」

　　因為呢宗冤案由零開始，已多多唔妥。包括：

　　一、點解一個案底纍纍，曾犯強姦、搶劫、勒索的積犯，有律師樓肯請做師爺，擔當重要角色，介入做游說的主要角色？

　　二、點解有咁多嚴重案底的師爺，可以「法律探監」？究竟懲教署有冇人知？有冇Check？

　　三、點解件案經過咁多有經驗大狀及法官，仍然冇人喊停而繼續去馬，告一單充滿疑點的案？

　　四、點解代表律政署的時任刑事檢控專員，理解案情後，會示意外判大狀硬告？究竟知唔知後果可以幾嚴重？

　　五、點解控方會撤銷懷疑刑責更重的主被告控罪，改釘無辜者？幕後有乜游說、交易做過？能否見光（當然估計「見光死」）？

　　六、最奇，單案經過兩位極資深法官手，點可能會咁蝦碌？

　　七、呢單案，明顯令法庭變為「司法不公」的地方，但控方堅持起訴，法官接受，將個波踢畀陪審團。

　　八、疑點重重，點解陪審團竟然肯「釘」？令被告要坐二十三年（如今已坐咗五年，才得以翻案）。

　　小弟的大狀老友們無不搖頭：「呢單Case，由師爺到控方，再到辯方、律政署、法官、陪審團、海關、懲教署，全部有問題，真係唔知點拆，且看稍後張舉能大法官有乜公告交代嘞。」

　　事到如今，各方先使出拖延大法去擋，因要「研究判詞」。

　　究竟日後會否有傳媒或專業法律團體咬住唔放，就要睇事態發展嘞。　

曾智華

阿碌開咪