【阿碌開咪】大把地嚟緊

上周六本報大大篇幅報道：《恒基及會德豐大埔地，新地元朗地，土地共享添兩申請，涉逾1.6萬伙》。

　　一萬六千伙？等於幾大？等於有多一個嘉湖山莊！點解地產集團「放地」突然大幅提速？

　　事實，政府去年五月提出「土地共享先導計畫」後，冇乜反應。相信各大地產商都在觀望政府「有乜牙力」先？因過去幾十年，地產商已發到肥豬咁款，成身肥膏，可以慢慢消化，兼且又有各樣法例保護，所以，「你」政府提出要地，「我」當然睇睇有乜着數先。最大唔合作藉口：我都要向股東交代㗎！

　　好嘞，去年《國安法》香港版通過，再明刀明槍開始「完善選舉制度」。即係點？說穿了，就是全面收權，包括土地權！

　　昔日N咁多法例保護地產商利益，但當明年政府及立法會改組後，只要關乎香港社會的廣大利益，修改法例，絕對可能會變「容乜易」。到時「敬酒」唔飲者，自然被灌苦酒及罰酒。

　　大家求財，不是求氣，各大地產集團負責人當然早早完全知道風向，過去一年按兵不動，純因先睇中央及特區政府有乜招數。粗俗啲講——睇下佢有冇料到？早前夏寶龍主任一錘定音，聲明香港劏房（包括籠屋及瞓街）要在指定時限消失。這是一個死令，有咗日期，方便做野。若地產商唔配合，後果堪虞。

　　所以，才出現上月開始，排隊「繳地」，參加「土地共享先導計畫」的踴躍現象。

　　地產商識做，政府就唔使出死力咁煩，咁當然也會識做，正是你敬我一尺，我就不會有權用盡，大家攜手搞公私營雙軌並行可也。如此，政府有地起公屋，發展商有地起私樓，再加上政府投資搞城市規劃，事事即水到渠成。

　　再下去，鄉議局當然聯同鄉紳也要多多合作，重建新界房屋版圖。然後，就是郊野公園邊陲地帶，能用的立即開發。

　　這樣，長年困擾香港低層市民的「有地冇屋住」荒謬現象，即可逐步解決。應硬，就要硬！

曾智華

阿碌開咪