【阿碌開咪】人人都話做顧問

顧問，即是出謀獻策，究竟係乜工作？真係有N咁多種層次。

最近我被N咁多老友追問：究竟是否與曾淵滄教授及胡孟青，在工聯會以「大蛤價」開投資課程？我上網一睇，嘩，離晒大譜！我哋三個的「課程」，總共只收三百八十元？咁不如義教好過。

實情係我哋三個都唔知「被開班」！即係點？懷疑用我哋名「行騙」！一查，原來呢類課程，外判畀一家「美之X」顧問公司。吓？咁都得？

執筆呢剎那，我仍在追查究竟發生乜事，點解工聯會都咁蝦碌？而呢家「顧問公司」點解在冇直接聯絡又未得我應承下，擺我上枱收錢？事態發展，容後交代！

講起江湖中的眾多顧問公司，當然公關為最多，尤其社會日趨複雜化，傳媒生態瞬息萬變，任何大集團、政黨、政客?…以至大學，甚至政府，全部需要公關顧問出謀獻策，塑造形象，希望能事事腐朽化神奇，咁就正嘞。

今時今日搞公關，已屬極度專業行為，絕非請客吃飯咁簡單。我老友利嘉敏教授，正是主攻此科，在中文大學任教，大量學生由外地慕名而來。佢最近出的一本書《逆戰公關》，正是嘔心瀝血之作，將大量全球經典公關大戰個案拆解，讀之眼界大開，津津有味。

事實，頂級的公關公司，做一張合約，隨時可收幾千萬港元！聽好似好貴，但若能將一個政府、一個集團，由形象瀕臨崩潰邊緣救回重建，也絕對物有所值。

講起「物有所值」，不得不提周二《頭條日報》屈穎妍專欄，讀完，我真是扼腕再三歎息。

專欄標題：《巨款丟失誰負責？》。講乜？正是講納稅人有四千五百萬元，剛掉進「鹹水海」，冤哉枉也。

若非屈小姐揭露，相信九成九香港人不會知道，特區政府一年前以四千九百萬元費用，簽咗一張合約，聘請國際公關公司Consulum主理一個「香港重新出發」宣傳計畫（終自動減價四百萬元）。絕對同意屈小姐批評——我哋究竟用幾千萬元「出發」咗乜呢？

曾智華

 

阿碌開咪