【阿碌開咪】加拿大熱死人

難以想像，難以想像，乜話？加拿大熱死人？珍珠冇咁真，仲要熱死幾百人！

香港人，十之六七去過加拿大，另有十之二三曾移民加拿大，肯定知道當地天氣如何。

小弟一九八四年曾短期移民，三個字——凍到癲。

當時住在多倫多對上小鎮Orillia，家家戶戶絕對冇冷氣，但家家戶戶絕對有暖氣，因為冇暖氣會凍死人，兼且全屋水喉會結冰而爆！

究竟加拿大可以點凍法？好簡單，有朝起身，嘩，大件事，攝氏零下三十幾度，但都要開工。去到戶外剷雪，凍到鼻水橫流，鼻水流出，一秒兩秒三秒，立即結冰！

呢種情況，我之前住香港完全冇幻想過！後來搬落多倫多住，好少少。但上世紀八十年代，連多倫多也不會太熱，夏天在室內根本毋須開冷氣，就算大熱天時，只要躲到地牢，咁就一年三百六十五日皆陰陰涼，好鬼爽。

用當年經驗與角度，又係點都難以想像，連加拿大都可以熱到接近攝氏五十度。俗語講句——想熱死人咩？

溫哥華我也去過幾次，次次氣候如春，景色怡人。究竟地球起乜變化，連這個北美國家也變得如此？有冇天文科學家可以解釋，以便人類及時「知錯能改」呢？

大家必理解，地球上的一切變化，大部分不會無緣無故出現的，突然如此從未見過的熱浪襲北美，合該有事。

今次熱到飛起的，包括美國西岸北端，也是離奇。上世紀七十年代，我曾有半年在俄勒岡州讀大學，也是只有春天、秋天與冬天，唔多覺得有夏天。所以，班鬼仔鬼妹一見到太陽，永遠第一時間「剝晒衫褲剝晒鞋」，飛撲到草地上郁都唔郁，曬呀曬。無他，絕少有機會接觸陽光及和暖天氣也。住在香港，我感謝上天，真係so far so good。凍又唔會凍到落雪。熱，也只是攝氏四十度以下。所以，冷熱甚少令人失救。只是，幸福並非必然。作為人類，大家真的要為保護環境盡一分力，before it's too late！

曾智華

阿碌開咪