【阿碌開咪】你不說我，我不說你

各位，大家可有發覺身邊有大量「游說專家」呢？甚麼是「游說專家」？正是喜歡問你——移民、政治傾向、打針、婚姻、戀愛、事業……者。

　　猛問你，並非關心你，只是跟住立即游說你，希望你改跟佢主觀意願而行。

　　眾所周知，兩年前呢類「游說專家」無處不在，於WhatsApp群組更是水銀瀉地，個個無非逼你——信我啦、信我啦，我的政治睇法最正確！

　　終於不少有「另類看法」者不勝其煩，先而忍耐，後而退組割席。

　　實不相瞞，我在個人社交圈及「粉絲頁」（Fanpage），都不停「手起刀落」。又Delete人，又鎖戶，搞到身水身汗，才得到耳根清靜，只留下大致上同聲同氣同價值觀，又或起碼知道甚麼是包容、尊重者，留在朋友圈及社交平台。

　　兩年前的「游說政治潮」完結。近一年另一大潮又出現，正是「游說移民（應否）」及「游說打疫苗」，其實兩者皆純個人決定，若非別人問到，我絕不會主動畀意見。

　　我移過民（火速放棄！），也打咗針，兩皆絕對是個人判斷下的決定。若你用你的角度看，十之八九不理解我需要及感受，唔該慳啖氣，唔關你事！

　　最近有世侄找我吐苦水，成個瘦晒：

　　「碌叔，我父母美其名為我好，逼我離開傳媒業，更逼我移民英國！」

　　「你唔想？有冇向佢哋解釋？」

　　「唉……佢兩個保守到震，乜都驚。我哋做傳媒，最喜歡活在漩渦中心，最喜歡見到有事發生，然後報道、分析。香港日日咁多大事，你鍾唔鍾意佢出現都好，皆是一個非常重要的時代現象。你叫我走去英國，地方又冇歸屬感，工作又唔會係自己喜愛的事業，為乜要去？我根本行得正企得正，一啲都唔擔心！」

　　世侄心態，我理解，但仍不會作出游說。佢成年人一個，選擇事業、婚姻，非常個人化。多口胡亂游說，實在多餘！

　　我又如何？一切有「禁區」，任何人切勿多事，將自己意願屈我身上！

曾智華

阿碌開咪