【阿碌開咪】D餐根本冇得搞

政府推出A、B、C、D餐，唔使做調查，都知全港大型飲食集團，除咗一兩家外，皆冇辦法可以做得到D餐。

昨晚與某大飲食集團老總Y哥晚飯，未食已吐到成枱苦水：「碌Sir，現實情況，D餐根本難乎其難！今鋪畀政府玩死！」

等小弟重溫D餐要求：員工要打晒兩針，食客最少一針，必須用《安心出行》，如此，就可八人一枱，宴會最多一百人。

「我哋當然希望食到D餐，但現實並不可行！」

Y哥個集團早前調查員工打針意向，結果有四成半唔肯打（最多為健康理由，另冇信心，想睇定啲副作用……），考慮打的有兩成半，願打的有三成。

點搞？於是唯有動之以「利」！首先，肯打第一針的，放一日假。打第二針，再放兩日假。然後，有現金及禮券各五百元作獎勵。

基於打針乃員工自由，資方決不能以唔打針作炒人理由，咁點食到D餐呢？

「唉，唯有再向員工『威嚇』！聲明集團將會有旗下酒樓專攻D餐，到時工作崗位會大調動。冇打針的員工，必須接受新工作及新地點安排。」

眾所周知，如今飲食業，高手廚師及優質服務員仍非常搶手，故此，以上「利誘」及「威嚇」根本無大作用。

說到底，其實D餐最攞命之處，並不在酒樓集團，而在客人。

「最好派班高官來集團實習三個月，咁，度出來的政策才會貼地。如今躲在冷氣辦公室諗的政策，不少非常搞笑。碌Sir，你話嘞，點解我哋一單D餐宴會都冇人問過？你知嗎？」

唔使考我嘞，我當然知，因D餐對客人的要求，絕對戇居！首先，客人必須用《安心出行》，已夠「趕客」了。更離晒大譜，要求客人最少打咗一針，更屬匪夷所思、天方夜譚！

「邊個高官度出來的，唔該諗諗，若佢嫁女請飲，夠唔夠膽咁冇禮貌，在喜帖要求客人『必須用《安心出行》及打最少一針』才可出席？你想親朋戚友反大面，就咁寫啦！」呢餐，阿Y噴到成地苦水。

曾智華

阿碌開咪