【阿碌开咪】D餐根本冇得搞
2021-05-13 10:30
昨晚与某大饮食集团老总Y哥晚饭,未食已吐到成枱苦水:「碌Sir,现实情况,D餐根本难乎其难!今铺畀政府玩死!」
等小弟重温D餐要求:员工要打晒两针,食客最少一针,必须用《安心出行》,如此,就可八人一枱,宴会最多一百人。
「我哋当然希望食到D餐,但现实并不可行!」
Y哥个集团早前调查员工打针意向,结果有四成半唔肯打(最多为健康理由,另冇信心,想睇定啲副作用……),考虑打的有两成半,愿打的有三成。
点搞?于是唯有动之以「利」!首先,肯打第一针的,放一日假。打第二针,再放两日假。然后,有现金及礼券各五百元作奖励。
基于打针乃员工自由,资方决不能以唔打针作炒人理由,咁点食到D餐呢?
「唉,唯有再向员工『威吓』!声明集团将会有旗下酒楼专攻D餐,到时工作岗位会大调动。冇打针的员工,必须接受新工作及新地点安排。」
众所周知,如今饮食业,高手厨师及优质服务员仍非常抢手,故此,以上「利诱」及「威吓」根本无大作用。
说到底,其实D餐最攞命之处,并不在酒楼集团,而在客人。
「最好派班高官来集团实习三个月,咁,度出来的政策才会贴地。如今躲在冷气办公室谂的政策,不少非常搞笑。碌Sir,你话嘞,点解我哋一单D餐宴会都冇人问过?你知吗?」
唔使考我嘞,我当然知,因D餐对客人的要求,绝对戆居!首先,客人必须用《安心出行》,已够「赶客」了。更离晒大谱,要求客人最少打咗一针,更属匪夷所思、天方夜谭!
「边个高官度出来的,唔该谂谂,若佢嫁女请饮,够唔够胆咁冇礼貌,在喜帖要求客人『必须用《安心出行》及打最少一针』才可出席?你想亲朋戚友反大面,就咁写啦!」呢餐,阿Y喷到成地苦水。
曾智华
阿碌开咪
關鍵字
最新回应