【阿碌開咪】電視大戰日日打

2021-04-23 10:00
曾志偉及王祖藍回歸TVB,雖暫未見有突破性新節目品種(大佬,一兩個月,搞得出乜野石破天驚之作吖,神仙咩?),但有個最最最大化學效果,就是香港電視圈,重新成為娛樂版寵兒,日日搶盡眼球,日日霸住頭條。

N年前廣播界老師傅教落:「阿碌,千祈咪希望同行唔掂,最好大家五五、六四,最差都要七三波,有得鍊,才能搞串個Party,炒熱氣氛,成行成市。呢個世界,最寂寞係『冇仗打』,若次次『單邊哲郎』冇得揮,觀眾當然冇癮,也會拜拜。」

高手思維——永遠製造對手,年年月月日日開打。最好勢均力敵,有火花,夠刺激,才能吸住公眾,如此,收視率必高,廣告商重錘出擊,咁就人人得益,個個興奮。

呢個理論,簡單到似ABC。試想想,若馬圈不是莫雷拉決戰潘頓、球圈不是C朗力拼美斯、歐聯列強不是難分高下?…點可能令馬迷及球迷樂透?

所以,任何行業,都要鼓勵及製造競爭,冇都要搞到變有!

香港電視業謝咗咁多年,當然好多原因,但歸根究柢,是TVB五十年來長期獨大。於是,決策人紛紛落下長遠會變「自殺」的決定。包括:一、縮皮(因以為反正出『手指』都有百幾萬觀眾);二、刻薄藝人(人工低到可恥地步,以為個個無路可走),搞到大部分冇歸屬感兼有離心,少少「有毛有翼」即頭也不回飛走;三、人才散失。工廠制度,流水作業,不再強調珍惜人才,台前幕後只給最低人工,自然創意全無,節目吸引不再。惡性循環下,收視變低處未算低。

當然,加上近年香港政治氣氛及傳媒尺度不斷收緊,也極之不利TVB,以至整個行業。

好啦,衰到無可再衰境況嘞,能否絕地反彈,未知。起碼黎老闆開罵完,無記換管理層,志偉及祖藍戰鬥格,怎也會炒熱個市,真正開打「電視大戰」。作為觀眾,我當然樂見烽煙四起,最好打到「血肉橫飛」!

曾智華

阿碌開咪

關鍵字

最新回應

關鍵字

熱門文章