【阿碌開咪】億萬金元代言人

上周六黃昏，我肥碌隱隱覺得，公務員事務局局長聶德權在開香檳，與大群做到身水身汗的戰友開心無比地慶祝。

　　點解？嘻嘻嘻，作為「谷打疫苗」大隊長，全港市民皆知，過去兩個月佢代表政府，真係出盡飲奶之力，度出N種「策略」，「鼓勵」市民接種疫苗。

　　只是香港傳媒透明度高，政府也不會刻意掩藏，於是，久不久就有新聞報道，個別曾經接種疫苗者有這樣那樣的問題出現。

　　這種消息，無論當事人是否因打疫苗出事，都會引起大眾的疑慮，於是，打疫苗比率一直無法大幅攀升。

　要說服大家打疫苗，一如商品推銷，除商品本身迎合市場需要（疫苗絕對應屬於這個範疇！）外，最好能請到具公信力者、有江湖地位者、形象正面者，又或有影響力者作「代言人」。

　　正常找一位星級人馬做代言人，已經必須「重錘出擊」，普通閒閒哋都要幾十萬元。去到巨星級數，例如早前周潤發谷何文田常盛街一樓盤，與郭富城谷「獅子銀行」尚玉戶口，相信若非出到八位數字冇得諗！

　　政府訊息，一般屬簡單又直接的正面宣傳，搵名人藝人做代言人絕不難，因有利個人公眾形象。但去到打疫苗這種「有機會出副作用」的推廣，一般明星藝人必有猶豫，多數經理人心態上都會Play Safe作出忠告：「唔……都係睇定啲先，較穩陣！」

　　今次推廣市民大眾接種疫苗，政府能用的代言人，除官員及政治人物外，相關有頭有面專家，例如袁國勇教授、許樹昌教授、莫樹錦教授……經已空群而出曝光作宣傳，可惜反應仍未算洶湧，咁點搞呢？

　　於是，首先在限聚令政策方面配合，再將開打年齡大降，幾乎想打皆可打，但仍未夠噃。

　　此時，嘩！突然「天降甘霖」，上周六社交平台彈出「超人」李嘉誠打疫苗兼作出呼籲照片。呢位「億萬金元」都買唔到嘅代言人一出，聶德權仲唔掂過碌蔗？

曾智華

阿碌開咪