(星島日報報道)無線劇集《乘勝狙擊》昨日於東港城舉行宣傳活動,陳展鵬帶着愛犬包包到場,他解釋說:「屋企無人,又應承過Fans帶畀佢哋見吓,所以帶佢落嚟。」之後展鵬更讓包包表演唱歌,他笑說:「佢天生㗎!之前我喺房自彈自唱,聽到廳有怪聲,原來係包包唱歌。」他稱愛犬今年將會成家立室,記者笑指他將做新老爺,展鵬笑說:「我唔係佢老竇啊,我係佢阿哥!(細佬爬頭結婚喎!)我唔介意,係我少收啲利是啫。」

  此外,劇中傅嘉莉跟陳山聰的牀戲已經播出,傅嘉莉表示播出當晚正跟父母食開年飯,感到相當尷尬。而陳山聰則表示與大哥大嫂及女友去泰國旅行剛回港,沒看到激情牀戲,但不少男友朋友短訊他指好勁好正。問到雞年可會好事近?他說:「工作為先,今年工作都好忙,同埋我要儲錢。有計畫,但未有日期,有好消息會話畀大家知。」