古天后日志｜入市资金萎缩 市场购买力减弱

7月22日，天晴，阳光猛烈，日间天气酷热，气温高企。美股隔晚继续做好，走势上更加系愈行愈强，多得Tesla业绩后劲成一成，带动美股气氛继续向好。道指升162点，标指升39点逼近4000点阻力，标指则重升12000关，升161点。三大指数均已升抵阻力位，美股究竟系向上突破阻力，定系阻力位又要回落，暂时仲要观察。

不过淡友平仓，而市场无视企业公布业绩后，大多调低全年预测，甚或裁员省减人手等坏消息，加上美国基金现金水平偏高，均令美股愈升愈有。值得留意系社交媒体Snap盘后公布业绩，管理层大幅调低下季业绩指引，其股价盘后急跌26%，市场卒之对未如理想嘅企业业绩有返啲正常反应，即管睇睇今晚美股点样行。

10及30年债息仍均于2年债息，反映市场沽短债买长债，即使当稍后经济陷入衰退嘅时候，联储局就要掉返转头减息放水救市，呢个亦系支持近日美股反弹嘅原因。不过喺通胀高企下，联储局嘅首要任务系搞返掂个通胀，所以眼见就业市场开始转差，暂亦无阻联储局收水，喺紧缩政策下，加上企业业绩下半年表现只会差过上半年，美股呢一轮嘅反弹，只系纯由资金推动，而近日入场资金亦唔算多，只系喺基金现货水平偏高下，无乜沽压，淡友一平仓，美股自然就推上去。

港股未跟美股升 恒指弹散格

至于港股，完全未见跟随美股升势，恒指一弹就散，21000水平企唔稳，噚日仲急急脚补埋周三嘅上升裂口，回落至20574，系3月及5月反弹延介伸上嚟嘅支持位，跟上周五情况一样，落到去呢个位就反弹。

目前恒指暂见支持，其实以值博率嚟睇，呢啲位都ok值博，但呢个星期嘅成交却萎缩，噚日都叫上返千亿成交，但早两日得800几亿成交十额，可见资金唔愿入场。接近低位都无资金入场，反映上月反弹追咗货嘅资金又坐艇，市场赚买力减弱。

古天后

(徐狄怡，证监会持牌人)