古天后日誌｜入市資金萎縮 市場購買力減弱

7月22日，天晴，陽光猛烈，日間天氣酷熱，氣溫高企。美股隔晚繼續做好，走勢上更加係愈行愈強，多得Tesla業績後勁成一成，帶動美股氣氛繼續向好。道指升162點，標指升39點逼近4000點阻力，標指則重升12000關，升161點。三大指數均已升抵阻力位，美股究竟係向上突破阻力，定係阻力位又要回落，暫時仲要觀察。

不過淡友平倉，而市場無視企業公布業績後，大多調低全年預測，甚或裁員省減人手等壞消息，加上美國基金現金水平偏高，均令美股愈升愈有。值得留意係社交媒體Snap盤後公布業績，管理層大幅調低下季業績指引，其股價盤後急跌26%，市場卒之對未如理想嘅企業業績有返啲正常反應，即管睇睇今晚美股點樣行。

10及30年債息仍均於2年債息，反映市場沽短債買長債，即使當稍後經濟陷入衰退嘅時候，聯儲局就要掉返轉頭減息放水救市，呢個亦係支持近日美股反彈嘅原因。不過喺通脹高企下，聯儲局嘅首要任務係搞返掂個通脹，所以眼見就業市場開始轉差，暫亦無阻聯儲局收水，喺緊縮政策下，加上企業業績下半年表現只會差過上半年，美股呢一輪嘅反彈，只係純由資金推動，而近日入場資金亦唔算多，只係喺基金現貨水平偏高下，無乜沽壓，淡友一平倉，美股自然就推上去。

港股未跟美股升 恒指彈散格

至於港股，完全未見跟隨美股升勢，恒指一彈就散，21000水平企唔穩，噚日仲急急腳補埋周三嘅上升裂口，回落至20574，係3月及5月反彈延介伸上嚟嘅支持位，跟上周五情況一樣，落到去呢個位就反彈。

目前恒指暫見支持，其實以值博率嚟睇，呢啲位都ok值博，但呢個星期嘅成交卻萎縮，噚日都叫上返千億成交，但早兩日得800幾億成交十額，可見資金唔願入場。接近低位都無資金入場，反映上月反彈追咗貨嘅資金又坐艇，市場賺買力減弱。

古天后

(徐狄怡，證監會持牌人)