古天后日志｜内银股下半年拨备料大增

7月15日，部份时间有阳光，间中有几阵骤雨。美股表现继续反覆，道指跟纳指分别跌142点及11点，不过早段一段跌逾200点嘅纳指，最终收复失地，收市倒升3点。美股单日波幅愈嚟愈大，同时成交亦开始缩减，反映市场流动性减少际，资金喺市场流动时间加速，由日升日跌转为半日升半日跌，缸边友明显倾向短打游击，资金唔愿喺市内停留。

踏入业绩期，JP Morgan率先派发银行股业绩表，喺坏帐上升下，JP盈利倒退28%，收入大减同时拨备增加，经济衰退下，作为百业之母嘅银行股，生意难做。乜嘢加息要买银行股，因为息差拉阔呢啲想法，实在唔少得，尤其经济衰退下，银行股点会有运行。JP讲到明为咗要留现金，唔会进行回购，连一向支持股价嘅必杀技都用唔到，你话几咁悲。

紧随CPI公布后，PPI出嚟嘅结果系11.3%，呢啲通胀据，已令到市场预测本月联储局加息0.75厘转去加息1厘，而加拿大央行已率先出手，将利率上调1厘，触发市场估计加息1厘恐怕变成常态嘅疑虑。联储局已多次强调目前首要任务系抑压通胀，呢个月加息1厘嘅机会大增，就连一向鸽派嘅联储局官员，都转咗口风，加息1厘并非无可能。联储局主席鲍威尔亦好清楚，若物价未能稳定，美国经济好维持强劲，及可持续嘅方式增长。

内地停贷断供事件续发酵

至于内地停贷断供事件继续发酵，不过内地一直强调要稳经济，呢个问题获中央高度重视，而阿爷日内将跟各大银行开会，商讨对策，估计都系要求银行揼水畀内房企业继续开工，以解决烂尾楼问题。不过内地民众断供，除咗系担心项目烂尾，要供死会之外，失业率上升，无工开，无收入，又何来有钱供楼花，呢次内地除咗要解决烂尾楼问题，经济上嘅问题未能解决嘅话，将会威胁到社会稳定，喺相关问题迫在眉睫下，即管睇睇阿爷如何出招应对。

暂时内房物管股嘅气氛仍然偏淡，至于内银就更加大镬，虽然间𣄽银行都话供断事件目前风险可控，但个别内房还唔到贷款，民众又断供，奇怪嘅系上半年内银股未见作大幅拨备，但问题出作嚟，真系可以当无事发生，预期下半年内银股不得不增加拨备，盘数有几好睇，大家心中有数。过往唔少缸边友，锺情买入内银股收息，但每次经济出现问题，有或者任何一个行业缺水失救，内银必定要负起救亡重任，2015年内地股市出现溶断，大量中小企出现财政问题，未能偿还贷款，当时内银就唯有收股票当系收返啲贷款，但呢啲企业直到依家都系僵尸企业，与其话银行系收息股，不如话内银系收尸股。

古天后

(徐狄怡，证监会持牌人)