【独家】私底下劲老友助拍冲突戏 顾定轩陈卓贤打交唔留力
2020-12-04 00:30 
顾定轩（Zeno）陈卓贤（Ian）最近在ViuTV剧《男排女将》首度合作，他们跟剧中演的排球员「King」和「鱼仔」都有不少相似地方。剧中他们经常有冲突，但私底下他们劲老友，反而有助拍打交戏可唔留力，而本身曾是排球港队成员的Ian，更直言拍剧比做运动员时更困难。讲到最近参加《全民造星III》，Zeno认为是个难得经验，自认跳舞唔掂的他更获Ian即场过料。撰文：杜淑霞 摄影：李维隆 服装：initial fashion(Ian)、 J uniqlo(Zeno) 场地：Nutshell Hong Kong
剧中Zeno演的「King」为成立排球队相当瞓身，现实中Zeno中学时都试过，可惜唔成功，「但系真系冇谂过拍剧可以帮我圆咗个梦，完成咗一个遗憾或者缺口。」至于Ian的排球生涯同饰演的「鱼仔」一样被天份所累，「同『鱼仔』几似会走精面，反而系后期先至更加努力，我记得第一次选青年队落选咗之后先开始更加努力。」
两人都承认好彩够friend先拍得冲突戏够逼真，最难忘两人大打出手，Zeno说：「我哋倾咗唔留力㗎啦！（Ian：要十几个人拉开我哋）如果我哋就住就好核突，侧边啲人觉得你哋真系好想打，掹住我哋个力好大，其实我哋系伤害咗身边嘅人。」Ian补充，「哈哈！肥仔喺后面秤住我，佢揭高件衫畀我睇，成个肚都红晒，因为佢秤住我嘅时候我挣扎。」曾经是排球港队成员的Ian，直言今次扮演球员反而更加辛苦，「喺场内场外都辛苦咗，首先场外，以前做嗰啲体力都系for打排球嘅能力去做，但系为套剧做gym完全系为咗身形，又要配合饮食，以前食嘢都唔会控制得咁严谨，今次真系好地狱式；至于场内有样嘢难，以前系为攞分同赢比赛，打咗10几年都系人哋拦网点避开得分，但拍嗰时人哋拦网要特登畀佢拦到，打落去只手度。同埋拍剧唔会畀时间热身，朝早6点开机就直接打，嗰阵时又冻，以前受伤啲旧患就会出番晒嚟。」
讲到最近参加《全民造星III》，Zeno承认因自信不足反想藉着比赛磨练，现在连最弱的跳舞也有进步，「其实你够信心，你enjoy人哋睇到唔觉得尴尬就得，已经叫赢咗。」当年参加《造星》跳舞同样唔掂的Ian亦认同，有自信及花时间练习最重要。
最新回应