【独家】ViuTV冇高佬忍痛拍《男排女将》 193爆肥仔坚锺意邓丽欣

2020-11-26 23:30

真人真事改编的ViuTV新剧《男排女将》，由邓丽欣率领饰演男子排球队员的MIRROR及ERROR成员演出。肥仔(梁业)同193（郭嘉骏）唔算重戏份，但都好抢戏，193系「矮仔」队中嘅最高一个经已好突出，而肥仔就成日搞鬼地带动气氛，令戏中众人Keep住Energy，仲成日𠱁到女神邓丽欣哈哈大笑。采访：方骞平服装：rulecrossingman_studio

饰演运动健将的193只客串6集戏，在剧中是最强嘅发球手，不过18年他参加《全民造星》时曾经断过手，原来到𠵱家仲未完全康复，所以肥仔觉得193属高难度演出。193说：「系呀，做动作易，但近距离镜头，观众系会见到只手冇力。」

再三追问下，193坦言有推过戏：「我真系有推过戏嘅，所以戏份唔多，但编剧、导演话呢个角色系为我而设，既然咁讲，只好问公司有冇帮我买保险？公司话有先去拍，后来我发现原来ViuTV冇一个高佬可以拦到网，所以咪一定要拣我罗！初头用力去拍波都痛，但都冇问题嘅，讲真打份工，一定要全力以赴，做到最好。」肥仔即搞笑和应：「啱呀！ViuTV宗旨嚟嘛！」193反问：「好似搞错咗喎！」至于肥仔多数喺场边打气，亦不时大声提醒队员：「大家快手，爽手啲！」193取笑他喺大wide shot抢Fo，「得鼻屎咁细粒！」肥仔最开心可以同女神Stephy合作，拍煞科戏时仲成功「抄牌」。193踢爆肥仔真心锺意Stephy，肥仔承认有偷睇女神拍咀戏，心谂：「如果系我就好喇！」193说：「佢淡妆都好靓，我成日近望佢，但佢唔知，Stephy直情系拣嚟做老婆啦！跟住生埋后代，仔女一定系好靓。」