【独家】开网上频道拍片讽刺时弊 Ben Sir戴定头盔搞创作

谂头多多嘅欧阳伟豪（Ben Sir）喺疫情下冇停步，正积极搞紧教育者联盟，做中间人角色为社福机构招聘大学生精英。另外他又同杨秉基导演开《戏B》YouTube频道，以故事短片形式嚟讲社会话题，鼓励大家逆境自强，当中有啲对白嗒落有味，令人会心微笑。采访：方骞平

《戏B》由Ben Sir孭飞，过足戏瘾，暂时播咗9集，超过18万人收睇，当中有啲讽刺社会时弊，较敏感对白嗒落有味，好似《我和空姐有个约会》中「无能的人是无情无义的，对我们航空业开完刀，好快就会对老师开刀…」《阴质教育：毋忘初心》又讲到：「报警仲危险啦！」

夹缝中表达讯息
不过，导演杨秉基就解读话：「空姐条片带出嘅讯息系无论经历几多挫折，最重要都系继续向目标起飞，而女主角就系被炒空姐，佢有帮手做剪片设计，证明机会留畀有准备嘅人。」Ben Sir就话：「想拍啲贴地片，令人反思，但就唔会有敏感题材，想Ben Sir死咩！所以我哋会戴定头盔，自我审查！喺夹缝中做创作先至珍贵，其实唔难拿捏，在乎互相尊重。」有份演《阴质教育：毋忘初心》的主播曾美华认为每日生活就系时弊，片中她同Ben Sir扮成中学生，一镜到底拍摄，相当好玩。Ben Sir笑说：「其实我目标想做『最佳新晋演员』，最想有金主投资我拍学校题材嘅笑片，因为学校系社会缩影，暂时先按《戏B》忠旨『做好人戏，就有人气，否则被人弃』，拍戏只系后话。」