【好坚强】遵守亡夫遗言做直播   肥妈话：老公成日返嚟「搵」我 

肥妈老公Rick月头因癌病离世，经过一段时间沉淀后，肥妈终于走出丧夫阴霾，生活回复正轨。作为肥妈铁粉之一的老公，由于「临行」前曾叮嘱肥妈一定要继续做煮食节目直播，所以肥妈处理好亡夫嘅身后事后，昨晚马上复工做Easy Cook直播，跟fans互动教煮蒜蓉牛油焗龙虾尾车厘茄及做姜饼人。身穿湖水蓝配橙色围裙的肥妈化了靓妆，精神奕奕，心情大靓，一开始就同网民打招呼say Hi，而且不时喺节目中大笑，仲兴之所至，开埋腔高唱励志歌《个个都做得到》及开心歌《Beautiful Sunday》，网民不时留言叫她加油，大赞她好坚强，唱得非常动听。

 

老公离逝早上见白鹤

节目中肥妈不忘多谢网民打气，还自爆老公多次返来「见」她，所以唔觉老公走咗。她说：「我𠵱家好开心，Easy Cook做得咁成功要掌声鼓励。喺呢段时间多谢所有fans关心我，大家一齐集气令我个人都好容易应付到每一件事，帮到我好多。我先生走得好安详，佢离开嗰朝，一早喺窗口见到白鹤，我心谂『唔系海边先有白鹤咩？』食完早餐佢因为透唔到气就送咗入院，佢喺医院同个细仔视像完，又同最锡嘅孙女讲完电话，之后话见到好多angel(天使)，半日之内就走咗，真系好修得到。」

返嚟咬咗一大嚿面包

「我当然好挂住我老公啦！我日日同佢倾偈，冇当佢唔喺度。我老公都好挂住我，佢成日返嚟搵我，系真㗎！唔系导人迷信呀！我听人讲，有摆佢生前最锺意食嘅嘢喺屋企，佢好锺意食搽咗牛油及果酱嘅黄糖提子包及饭，佢好曳，返嚟咬咗一大嚿面包，而『三七』时，佢明显食晒筷子隔离啲饭，筷子上仲黐住两粒饭喺度，面包都有咬过，但唔系畀老鼠食，因为枱面啲嘢冇凌乱，蛋糕依然喺度。而每晚凌晨三点几，屋企六只狗狗会向住佢书房吠同摆尾。今晚开live，都有只飞蛾伏喺门口，前几日我个仔喺西贡住所都见有飞蛾伏咗一晚唔肯走。」

家人喺身边定要珍惜

肥妈坦言老公离逝初期真系好辛苦，𠵱家谂通咗：「佢临走前好似预知咁，喺厕所加建扶手，最初以为佢为自己而设，点知我呢两日真系整亲脚，要扶住先去到厕所，佢好似仲喺我身边咁，永远活喺我心中，只要心中有佢，佢永远就喺你身边，永远喺度陪紧你，所以唔使惊。」她对住镜头跟亡夫说：「老公！我有做呀(直播)，我做嘅嘢做晒喇！」目前两个仔搬返肥妈家住，细佬又成日嚟陪她，给她有强烈家庭感觉，肥妈有感而发说：「𠵱家疫情好紧张，希望大家都多啲留喺屋企食饭，多啲同家人聚吓，原来一世人流流长，其实只系得几十年，几十年有几长呀？家人喺身边一定要珍惜。」