长期尾指托机致掌骨发炎　邓颖芝：痛到手掌郁唔到

成日话玩得手机多好易有痛症，邓颖芝（Vangie）就系最佳人办！话说Vangie经常单手用尾指托住部iPhone，大约一星期前开始觉得尾指有少少攰攰哋，不过当时她却没有正视问题，以为揿少啲手机就会好番，点知昨日终于「出事」喇！Vangie昨日于IG贴出右手包扎照，以及「单手托机」反面教材照，她写道：「今日痛到成只手掌郁唔到，手指尾亦都伸直唔到，一郁就超级无敌痛。吓死，几惊系生骨刺嗰D（啲）！去睇跌打，医师话我手指尾冇事，但系掌骨第五节发炎，因为部电话有重量又成日用手指尾托住，佢话成日都有呢类型嘅客人，最严重系手指尾永远都伸唔直。如果大家用电话，会好似我咁用手指尾托住部电话，就要留意一下了 #减少单手用电话 #包住一只手全日活动都好唔方便 #食饭冲凉洗面去厕所都要用多好多时间」

见过鬼怕黑的Vangie又直言以后都唔敢单手用尾指托机，仲自嘲：「咁样受伤确实系戆居。」对此，不少圈中好友都纷纷留言慰问，仲多谢她提醒𠻹，其中，日前俾狗咬爆唇的Super Girls队长Aka（赵慧珊）亦表示：「Omg take care vangie.」伤势比对方轻的Vangie即回覆：「Thanks pretty ，我好小事。你要小心处理伤口。」