【独家】《杀手》打戏连场零替身 56岁黎耀祥拍到以为自己会死

2020-07-16 19:00

56岁黎耀祥为《杀手》操到钢条身形，剧中佢饰演好打得嘅「兜踎杀手」阎武，全程冇用替身，由头打到尾，对佢嚟讲绝对系突破，祥仔形容拍到几乎攞埋条老命，有几次更加辛苦到令佢好担心过唔到嗰日：「谂都谂唔到，50几岁人先行紧五行欠打运！」采访：方骞平

黎耀祥从来未试过为拍摄打得咁厉害，形容今次系终极一战：「其实当初谂住唔再同TVB续约，keep返自由身，但《杀手》无论喺题材、创意、监制诚意都数一数二，就系因为呢套剧续返TVB部头合约。不过，接剧时我只知道故事大纲，唔太知细节位！」

操肌好苦
祥仔形容睇见通告嗰刻好惊，因为两日先拍得一场打戏，「肯定打得好细致，所以嗰排震住出去开工，最惨追逐戏又多，跑到连膝头都肿埋，又冇时间睇医生，唯有肿住嚟拍，就住跑半条街，跑完打完，弯身绑鞋带时，啲汗系咁由个头滴落地。」祥仔笑言以前多数拍文戏，最多搞笑扮吓箩记，从未试过咁辛苦。但佢都觉得开心，「唔辛苦出嚟嘅嘢系唔会好睇，真系有目标先可以鞭策到自己，做啲从来未做过嘅嘢，加埋刻苦操肌，太辛苦喇，唔好再试。」

祥仔大赞睇剧好大满足感：「畀人打到飞起，畀个安慰奖我都好呀，当然想再夺视帝，或者颁个『老飞跃进步奖』都唔错，奖项代表住台前幕后功劳，唔系一个人嘅荣耀。」