唐丽球自爆伸脷锡莫少聪 被唱通街冇人再搵拍咀戏

久未露面的唐丽球（波波）受访开电视节目《开工大吉77》，与好友苑琼丹分享圈中秘密。波波称当年赴台拍剧，全因旧公司拒加人工：「当年开份约畀我，签5年、6千蚊一个月，我求佢话加多500蚊畀我啦，佢哋都唔肯，咁我咪走去台湾罗。当时人生路不熟，都冇换台币就出发，第一日唔使拍嘢，点知等等吓肚饿，但周围都唔收港币，最终等剧组收工返嚟接济我。」

波波谓当年与莫少聪拍接吻戏，但乌龙百出成为佳话：「依家讲返都唔好意思，当年第一次拍Kiss戏，唔识点样做咪真系锡罗，事后阿聪周围同人讲，波波条脷好劲，将噚晚条菜都挑埋出嚟，从此都冇人搵我再拍呢类镜头啦。其实呢啲丑事都唔想讲，因为苑仔我先肯再提。」

苑仔称跟波波丈夫吴毅将相熟，故一直得知对方近况：「佢哋都好Sweet，不时都会通电话报告近况，其实都识咗30年，真系吓一跳。头先佢提个女出国读书都喊出嚟，证明佢母爱几伟大，佢笑自己老年得女，所以好宝贝。」