【独家】雷有辉8月Show如期开 邓建明出心出力帮到底

太极乐队主音雷有辉（Patrick）喺乐坛超过40年，帮过好多红星如叶德娴及黎明等做和音，跟过已故梅艳芳及陈百强等走埠登台，更加系张国荣御用和音，资历丰富但从来未开过个唱，好兄弟邓建明(Joey)即出手穿针引线成好事。Patrick将于8月15至16日于西九龙戏曲中心举行个人音乐会《PAT Music Over Rainbow》。对于第三波疫情爆发，问Patrick会否取消音乐会，他称未收到通知，而Joey亦坦言未有Plan B，表示主办商唔会咁易放弃。采访：方骞平 场地：海港城台北.寛巷子

Joey好帮手，唔止介绍老细帮Patrick开show，仲出心出力，由音乐总监、幕后策划、「结他妹仔」一手包办，Joey说：「佢把声系行内和音界冠军，点解唔开一个solo演唱会呢？我唔使去鼓励佢，大家有耳听嘛。基本上喺嗰个场地，一把靓声一枝结他，唱一系列大家熟识嘅歌就ok，唔使要好多嘉宾。」

Joey仲派定心丸畀Patrick：「放我喺度有招财猫效应，旧年11月我都喺社运期间顺利开到演唱会，所以佢唔使担心8月个show。03年港台为踢走沙士叫我哋唱《We Shall Overcome》，唱完疫症即消除，所以我特哋喺ViuTV节目《Chill Club》度为佢再唱多次。」Patrick获鼓励下信心满满：「好多朋友兄弟撑我，压力都消除咗，冇犹疑到底开唔开，而且8月系靓期。𠵱家我好fit，总之大家要洗多啲手，保持卫生。」

问到可会请埋太极兄弟撑场？Patrick笑说：「太极兄弟嬲猪，唔畀我唱佢哋啲歌，话我飞起咗佢哋喎，其实系调返转。」Joey又为他谂埋计：「咁改编首《留住我吧》，咪唔关佢哋事罗，佢哋冇声出！哈！」