【头条独家】拍小占访不同妈咪好感动 欣宜挂住肥姐住家靓餸

欣宜和小占（英健朗）最近首度拍档主持ViuTV节目《最爱母饭开》，齐齐拜访不同家庭的妈妈，跟她们学煮一餐好饭照顾家人，了解她们努力为家庭付出的故事。两人都被这些妈妈爱的故事感动，更特别想食住家饭，欣宜更想起妈咪肥姐和婆婆下厨整的靓餸，一度好后悔冇跟她们学整，幸好家佣姐姐帮到手。

撰文：杜淑霞 摄影：李权威
发型：Milk Chan@xenter(欣宜)
化妆：Samuel@江中平化妆室(欣宜)
服装：ad-lib(小占)
场地：HonKee Party汉记 (IG: honkee.party)

欣宜原来接这个节目前好担心，因是首次正式做主持，加上中文唔好，不过亦成为挑战自己好机会，「我成日觉得唔识嘅嘢就去学，或者练习多啲，好彩遇到小占呢个好拍档大家又有默契，有佢喺度个气氛真系会好啲开心啲，拍完都有啲挂住佢㗎！」小占即好冧话：「So Sweet！」

特别想念婆婆
两人拜访不同家庭的妈咪，得到热情款待，他们笑言每次好似去拜年一样，更被他们的故事感动，小占更爆欣宜喊咗好次。欣宜坦承拍摄时会特别想念家人，「特别谂起婆婆，因为由细到大系佢凑大我，佢煮饭畀我食多，婆婆系最后一代紥脚嘅，佢系着童装4号鞋，每日都好坚持亲自买餸煮畀屋企人食，每星期仲有一、两次系姨妈姨丈同朋友一齐嚟食，佢咁细粒嘅人煮9餸1汤，所以因为呢个节目我有落力去学整餸。有集跟个妈咪学整烧腩仔，拍完我攞埋食谱走，有整畀朋友食，佢食晒㗎！」本来她有点后悔冇跟婆婆和肥姐学煮餸，但原来唔会太迟，「我屋企个姐姐跟妈咪学咗婆婆啲餸，拍紧呢个节目尾声，我有日请朋友嚟屋企食饭，佢话加多个海鲜，原来佢识整油爆虾，呢个餸系我最锺意妈咪整㗎，原来佢学咗，真系超好味，仲有好多餸佢都识，我叫佢写番晒啲食谱出嚟，我可以跟住学嚟整。」