【头条戏场】《变雀特工》世界上好彩有猫

《冰河世纪》系列幕后班底创作，讲述一个只信自己非常招积嘅特工兰斯（Will Smith声演），被误会叛变后误饮一支药水而变成一只白鸽嘅故事。特工加历险加间谍加动作连场及天马行空，我觉得几得意，特别系班雀，黐黐地线又好有义气，睇戏嗰阵坐我旁边嘅𡃁仔笑到左摇右摆，好夸张，从而推断呢套动画应该好啱𡃁仔睇。(刚上映)撰文:廖思慧

发明变身药水嘅系天才科学家德仔(Tom Holland声演)，佢好叻，15岁就毕业于麻省理工学院，之后加入特工局研发装备同武器，坚守「非暴力唔攞命」大原则，佢由细到大嘅发明都好厉害，就系太劲被歧视，同学笑佢怪，话佢骑呢，自小无朋友好寂寞。

古灵精怪特工装备
因为一次意外，兰斯同德仔变成拍档，前者开头极度唔妥后者，觉得陀衰家无鬼用阻手阻脚死开更好，睇惯戏嘅都知两位哥仔之后必定因误会而了解更深，继而产生感情。一只雀加一个成身古怪特工装备嘅宅男去拯救世界，搞嘢装备包括我最锺意嘅「猫猫闪粉手榴弹」，一爆炸会发放闪粉同猫咪影像，敌人秒速冧爆分心兼投降，本人觉得非常无敌；仲有「充气抱抱」，能形成强劲的泡泡保护外层，令内里嘅人免受伤害。其它武器仲有可发射劲力绳索同令人讲真话嘅「多用途笔」、「碰碰万花筒」、「催眠星星」同「打喊露鱼雷」等等，统统得意又过瘾。

究竟点解要系雀?导演Nick Bruno笑说：「白鸽无处不在，全世界每个城市都有佢哋嘅踪影，冇人会留意佢哋，所以特务化身白鸽就最方便行事！」