蔡少芬𦧲B仔上契 陈法蓉唔制

恭喜发财！踏入新春佳节，蔡少芬（Ada）与陈法蓉（Monica）实行搞搞新意思，齐齐大煮两度贺年菜：「万事如意五福袋」、「招菜进宝黄金虾」，跟大家拜年。两位相识逾20载的好闺密，难得首次共同下厨，即「针锋相对」笑料百出，当中Ada更大爆Monica大派「柠檬」拒绝跟她的细仔张乐儿上契。

现身煮场的Ada与Monica表现有板有眼，无论洗丶切、煎、炒皆无所不晓，绝对系「美貌与厨艺并重」。当中自夸「煮咩都OK」的Ada，透露闲时经常入厨，就连囡囡返学的饭盒、点心均由她一手准备，但自从细仔出世后，忙于照顾儿子，才疏于入厨；其后，Ada又向Monica「笠高帽」表示：「其实我哋两个煮嘢都叻，叻喺唔同范畴，Monica蒸嘢好叻！」Monica闻言即沾沾自喜说：「系呀，曾经喺蔡澜节目，煮过冬菇煀鸡，蔡澜试食后话系佢食过最好食嘅冬菇煀鸡。」身旁Ada即神回：「系咪蔡澜从来未食过咋！」此话一出即全场哄笑。

Ada与Monica无所不谈，提到过往张晋亦曾为Ada下厨时，Ada即问Monica：「你有冇煮过嘢食畀男朋友？」Monica亦大方表示：「一定有，而且我煮一定会好食，因为我用爱心煮，通常都系简单菜式。」在烹调过程中，Ada竟大爆秘密：「我本来打算契个仔畀佢（即Monica），等佢有条仔，而且仲要系靓仔添，点知佢唔肯，我老公都叫我唔好迫佢。」Monica反击表示：「点解要契呀？分身家畀你个仔呀？我有好多朋友都有小朋友，好难个个契，而且我又好锺意你细女，唔通女我就唔契，仔就契咩？既然我同你关系咁好，唔使契啦。」

除了「针锋相对」，其实Ada与Monica亦有晒温馨的一面，Ada透露当年参选港姐时，曾在髪型屋撞见Monica，这是她们第一次遇见，Ada说：「当时陈法蓉已经系港姐冠军、雍容华贵嘅大明星，我只是其中一位参选佳丽，点知转头有个发型师走埋嚟同我讲『有人赞你靓喎！陈法蓉赞你！』我开心到几晚瞓唔着。」
提到她们第一次合作出埠到台湾，在Monica眼中，Ada是不停做运动，就算得几级楼梯，她都刻意行上行落；Ada眼中Monica，是个很懂照顾人的女仔，Ada谓：「佢全程帮我翻译国语，我心谂『点解会有一个心哋咁好，又咁靓嘅女仔』。」Ada与Monica又忆述03年合作大陆剧《水月洞天》，当时大家的粉丝在网上互闹，Monica指：「我啲粉丝闹Ada做『冇饭食嘅排骨』，佢啲粉丝闹我做『匿喺蒙镜后嘅老妖怪』，之后我哋拖住手同啲粉丝讲，其实我哋真系Friend，跟住先再冇互骂。」