【头条独家】《家有囍事2020》演娘爆土豪 谭耀文唔觉意激发虚荣心

入行32年的谭耀文喺工作上keep住有突破，原来《家有囍事2020》系佢嘅首部贺岁片，片中阿谭饰演大反派黑帮首领，有曲发造型兼衣着非常老土，笑言连自己都想呕，加埋要「懒」幽默，坚好玩，过足戏瘾，最开心系连拍戏都搵到份虚荣感，他自爆其中一幕开大型生日P，见到现场周围放满他的Q版肖像大油画，当日特别High！采访：方骞平 场地：Studio King影楼王

谭耀文在《家有囍事2020》中继续做大反派，阿谭说：「以前喺《财神到》、《花田囍事》等贺岁片都系客串性质，今次第一次贺岁片孭重飞，对我嚟讲几新鲜好玩，虽然我唔算搞笑能手，只系「懒」幽默，好彩『娘爆』土豪造型帮到唔少，睇见都想笑，第一日造型时连化妆间工作人员见到都忍唔住话：『掂喎，得喎！』听见信心都大啲。(咪抢戏过3兄弟？)咁又唔得，要恰如其份，大家发挥唔同嘅效果，ChiLam有body language；张继聪好搞笑；百鸣哥本身经已系品牌代言人，现场提供好多惊喜。」

土豪开P好自豪

阿谭最难忘场口系讲开他开大型生日P，由于片中「鳄鱼谭」系集团主席，生日会请晒公司所有员工甚至传媒参加，去到现场见到周围放满他的Q版肖像大油画道具，拍戏以嚟都未试过：「感觉变咗蒙娜丽莎，油画连眼肚、颈纹、皱纹都画得好细致，感觉好真，好似假戏真做咁，所以当日心情好High，好自豪，好自满，特别得戚！哈！我谂住拎走啲画，放2张喺屋企，望住自己当神咁拜，年年生日拎出嚟自High一吓，所以拍呢套戏满足到我嘅虚荣心，原来潜藏咗喺心入面咁耐都唔知，点知嗰日心花怒放到穿晒崩！虽然系俗气咗少少，但咁搞生日都几开心，谂定自己结婚周年会唔会咁搞先。」