阿碌开咪｜选举投票率牙骹大战

老友聚头晚饭，为免伤和气，最佳是两杯到肚，爆下无关痛痒秘闻（例如最近N加N咁多人问我，当日梅艳芳参加《新秀歌唱大赛》，究竟边个独一无二、有眼无珠评判，明明佢弹离赢，仍要打个大交叉想踢佢出局？），讲下边度有好食，八下娱乐界、商界、政界等有乜新料等等。

政治？多讲伤和气，也嘥气，避之则吉。

不过，唔讲政治内容啫，估下政治形势可以啩。故此，近日各路英雄饭局，最多人互问系：「下届特首会由边个做？」然后七嘴八舌乱鬼咁猜。

小弟永不参与这个竞猜游戏，因为估乜都绝对多馀。你有权决定咩？冇喎！之但系，你又问唔到决定者，咁就无谓浪费口水啦。昨晚一大群政界、传媒界、学术界及专业界老友开花锦鳝王加古法羊腩煲大餐，食到高潮，我一二三抛出个大家都有兴趣的竞猜游戏：「各位各位，搵啲嘢估下，铺定下餐边个请好吗？」

哗，个个即时摩拳擦掌：「快快快畀题目！」

「就系……估估十二月十九日立法会投票，直选部分，投票率将会如何？」我大大声讲。

建议一出，七嘴八舌，笑死冇命赔。真系断估冇痛苦，竟然由一成到七成都有人估，非常两极化。

结果点呢？由我一锤定音！

「七成就肯定冇嘞，无谓天真，一成则又攞嚟讲啫。咁啦，听晒咁多位意见，我刚刚计出平均数，为两成半！就以此划界綫。买上嘅先举手！」（结果，七只手！）「好！买下嘅，就系其他，即五只手！十二月十九日后即知，睇睇下餐七人请五人定五人请七人嘞。」

小弟观察，估超过两成半的七位，包括建制派议员、大集团行政人员、高官及娱乐节目名主持。至于认为两成半以下投票率的，则清一色为资深传媒人。唔……都几有「界别分歧性」喎。

近日各位可有发觉，大量「期望管理」言论不停涌出？其实这已经有相当大的指标性！睇睇呢铺开乜先？

曾智华

 

阿碌开咪