阿碌开咪｜夫妇能不谈公事？

行走江湖，有一定资历者必知，某些世事世情，角色需要，必须按剧本讲，但一定做唔到！

点解？除非你唔系人，冇人性啦！

例如夫妻同在一家公司工作，你真系可以二十四小时公私分明，绝口不提公事，包括机密？老友，小弟职场做四十几年，真系一单都未见过喎！边个会有咁犀利，开个名畀我去查下啦！

不过，话说回头，对外当然要咁讲啦，因如此才「操守/政治正确」！你一定知我讲边个，正是夫妇皆纪律部队出身的政制及内地事务局局长曾国衞及新扎海关关长何佩珊是也。

记者问到，当然要答：「平时无乜需要，亦无乜机会，将公事好具体咁攞出嚟讲。」请留意「具体」两字！

夫妻严禁在同一部门工作，乃举世大机构，尤其金融银行集团的铁律。不少规定，一拍拖，立时调职，冇情讲！必须黑白分明地避嫌，因冇人会相信你「返屋企唔讲公事」。

不如清清楚楚分开。谈恋爱？有所牺牲罗。简单，一个部门内（公营、私营皆如是），必有竞争，而人性中，十之八九不会对人对事对物会冷静、客观、公平地去分析，尤其涉及自己利益，更肯定「戴有色眼镜」去睇。

所以，若平排竞争者中有上司的情人，哈，唔使讲你都知会点，一定是非多到「冷气槽踬爆」！而其他同事也日日当睇戏咁睇。

此时，上司无论点做，也不会被觉事事秉公办理，终可能搞到连个人威信都冇埋！

所以，最好由公司明文规定，同一部门内，不准谈恋爱，以免公私混淆，避免引起内部矛盾。

小弟早年加入香港电台时，就经历少少尴尬，唔系我，而系我的上司张文新与下属车淑梅。两人拍拖，点搞？一个二台总监，一个二台花旦。

得！一于我做「管理三文治」，在新哥未调升前，淑梅一切公事，由小弟这个副总监处理。

当然，仍未能完全塞住悠悠之口，但起码有个「公事垫」卸力，结果，五年相安无事，未出过乱子！

曾智华

 

阿碌开咪