阿碌开咪｜志伟，乜咁快就……

曾志伟经常带畀人开心，连接受娱乐版独家专访，也一样过瘾到震。

　　大大只字几条标题——掌管TVB认「蠢」但无悔，曾志伟急搵接班人：愈快离开成功感愈大！

　　正常大机构行政人员，边会讲野咁出位㗎？但佢唔同，艺人出身，擅长搞笑，形象深入民心。若正正经经接受访问，反令大家唔习惯，难以接受。

　　佢老哥讲真讲假，只有自己知，但旁边班老友（N咁多，多过天上星星），一年前真系冇个相信佢能够正正经经做个大机构行政人员，而又……做得长！因性格命生成，志伟极其喜欢弹性（包括工作及上班），点可能日日朝早八点坐定定，开完一个会又一个会，睇完一个报告又一个报告，签完一叠文件又一叠文件？

　　但佢今天在TVB的岗位，讲得非常俗，真系……「倒泻屎都关佢事」！以佢咁大开大埋，点顶呀？

　　于是乎一众百厌星老友就在背后开盘，开乜盘？正是：「大家估估志伟能够做几耐，愈长赔率愈高，买定离手喇喂！」

　　终于估佢做一个月唔玩有，三个月也不少，睇半年的占相当多，至于做上一年就……我又点睇？我买——三年！

　　小弟与志伟同年，大家皆快六十八岁，未来两年极重要，因为迈向人生一个重要关口——直奔七十也。

　　一到七十，对生命必有另一套谂法，因经已时日无多，若能行得走得，一定会尽做心中想做的事。样样都可能会做，但绝对唔想再为搵钱走去捱世界（亦无需要）。

　　志伟出身TVB，唔想母公司衰，故有种使命感，希望搞番好佢，然后才功成身退，所以，未来两年好重要。

　　搞综艺节目，完全难唔到佢，因拿手，更何况有王祖蓝坐镇？事实过去大半年已搞出一定成效。唯一考起的是未来日子，能否有令人耳目一新的另类品种节目横空而出呢？

　　若有，又有口碑，收视又能延续的话，咁到时佢就真系大功告成，可以真正享福去也！

曾智华

阿碌开咪