維港會：喵星人獨佔泊位照瘋傳 網民大讚「貓肉霸位」

人肉霸車位惹人討厭，但有網民分享「喵星人」在停車場霸車位的照片後，即俘虜大批貓奴，大讚貓貓可愛，笑稱「無泊出界，係好多車主嘅榜樣」。

網民Ivan Lai昨在facebook群組「馬路的事討論區」上載照片，可見一隻啡白色貓貓卧在在停車場泊位的正中間，似是望着拍攝者，其身後的牆上則寫有「請勿佔用兩個車位」。

照片隨即引來大批網民留言和轉載，但並非怒斥貓貓霸車位，反而指「貓肉霸位」超級可愛，「阿喵冇牌都拍得咁正中，反觀隔離」、「冇出界，泊正中間，左右有預留足夠空間。貓貓冇錯，咁都放上網公審，樓主快啲去買罐罐道歉啦」、「新年搞搞新意思，唔用人改用貓去霸車位」；有網民則笑稱「違泊呀，拖佢返去.....養啦！」另有人亦分享在一露天停車場，發現有狗狗佔據泊車位，閉眼熟睡，十分搞笑。