著起婚紗個肚囉囉攣 Grace：好開心有個咁好咁錫我嘅老公

陳凱琳（Grace）分享完鄭嘉穎接新娘的感動時刻後，她先多謝出席婚禮的朋友，特別是籌備了好幾個月，朋友全部好幫忙保守這秘密，所以很感激他們。同時嘉賓都要專誠請假，及遠道而來他們的婚禮，包括有加拿大、歐洲、香港、新加坡，令她感受到大家都好用心好有誠意真感恩。

然後Grace再分享行禮的心情，說：「行禮前我叫嘉穎快啲去咗教堂先，因為我唔想畀佢睇到我著呢條婚紗，因為從來未見過。當我自己著起呢件婚紗個肚好似囉囉攣咁，因為好緊張，跟住心跳又加速；真係去到教堂前面，我聽到音樂起，深呼吸同我爹哋一齊繑住佢隻手，一齊行入嚟，跟住嗰一刻見到全部人企起身去歡迎我哋，同埋戥我哋好開心嗰個感覺，我覺得我哋原來一直去鋪排呢件事終於成事。跟住行到最尾時其實我已忍住唔想喊，一望住嘉穎時佢已經係流出一滴眼淚，估唔到竟然佢係比我早喊，我跟住都忍唔住都想喊，所以我哋喺祈禱時已要攞紙巾抹眼淚，其實呢個感覺有少少超現實，我覺得真係嚟到呢一刻時真係好開心有一個咁好嘅老公，咁好咁錫我嘅老公，好期待我哋將來嘅幸福快樂，雖然我覺得婚姻有好多階段要經歷，但我覺得呢一刻係最開心。」