胡定欣想孖吳鎮宇拍檔長做長有 黃德斌自爆搞喊男觀眾

吳鎮宇、胡定欣、黃德斌、余香凝、導演陳詠燊等為電影《逆流大叔》出席戲院謝票活動，與觀眾見面。雖然面對強勁對手《與神同行2》及《多啦A夢》等多套暑假猛片襲擊，但《逆》片依然贏盡口碑獲得觀眾愛戴，入座率達八、九成。

吳鎮宇坦言要堅持到底，好少遇到電影口碑好，要先固定吸納到觀眾，他說：「好奇怪現象，諗住死啦！應該都無啦！我們又勢均力弱唔會好多宣傳，不過香港人好鍾意睇返貼身的事。」對於可有信心憑該片於各電影頒獎禮得獎，吳鎮宇搞笑謂不要經常提，搞到心掛掛，但出來票房成績好經已是最大回報。談到胡定欣初登大銀幕，電影就獲好成績。吳鎮宇笑說：「我哋靠佢㗎！唔係點解一個全新電影人，但有知名度。」

胡定欣自覺幸運，首次參與電影演出獲得如此好成績，加上很多同行支持，她也是自掏銀包買飛入場觀看，因為覺得幸運，所以點都要撐返自己。她說：「我之前純粹睇劇本睇返佢哋班大叔劇情，但真係好精彩，呢班大叔在生活上遇到的事，我覺得身為香港人覺得好貼地，同埋好有香港味，對白又抵死！」至於跟吳鎮宇拍檔演電視劇《衝上雲霄II》及《逆》片也獲好成績，問到可覺兩人是最佳組合？她說：「如果咁好組合，唔怕長做長有！我覺得今次呢部電影自己未夠喉，好想仍然有不同機會，對我來講已經好幸運，已經是很好的開始。」

戲中飾演泰哥的黃德斌，透露日前於街上遇見男觀眾大讚該片好睇，而且睇到喊。他說：「呢位30幾歲男觀眾話覺得泰哥呢個角色背負太多壓力，公司上下都唔係人，加上屋企壓力，佢話好感受到，學識得放下。如果一部電影有人睇完之後有一種共鳴，亦可能受影響到，是幾開心的事。」