【航班突削】快運風頭火勢fb推優惠 網民勁「嬲嬲」：仲夠膽買咩？

香港快運突然取消黃金周14班來往香港至日韓航班，令大批準備開心出發旅行的港人慘成「苦主」，心情跌落谷底。航空公司積極採取補救措施之餘，昨晚繼續於其facebook專頁推出「23個航點票價高達5折」優惠，結果帖文一出即被網民「嬲嬲」，有網民留言鬧爆：「仲好意思推出優惠」，直斥「如職員唔夠或資金唔夠就好心接（摺）左（咗）佢啦。」 香港快運昨晚宣布取消黃金周多班來往香港至大阪、名古屋及首爾的定期航班後不久，已在其facebook專頁推廣手機App限定優惠，23個航點票價高達5折起，並稱「無論您鍾意去日本嘅寺院過返個寧靜嘅下午、喺台灣街頭大吃大喝、定係去東南亞享受陽光與海灘，呢個優惠都好啱您」，提醒大家零時用手機App訂購優惠機票。 帖文一出，有網民嘲諷「好欣賞個admin仲敢出post（帖文）」，留言的都幾乎一面倒鬧爆：「取消18班機仲夠薑叫人買」、「仲夠膽買咩？無誠信！」、「你尋（昨）日cancel咗我班機，等我打咗76次電話先好好彩先改到機票......我以為係一班半班機直到睇新聞。而家又仲夠膽出po叫人買機票？」但亦有人留言指，「鬧咩，到人哋又出平機票嘅大家咪又係搶住去買」。 此外，國泰航空昨晚亦趁機抽水，在其facebook專頁發帖稱，作為「以港為家的航空公司，我們明白假期對香港市民大眾的重要性。」航空公司已準備就緒，協助受影響旅客。