【無線開Live望平反】麥明詩馮盈盈講好說話 雷莊𠒇：Media扭曲我

自星期日選出新一屆港姐後，出爐冠軍雷莊𠒇（Juliette）同「校長評判」鄭裕玲（嘟姐）都成為焦點人物，Juliette的言論、家底、外貌均被品評。今晚TVB專程開廠在big big channel直播，請來麥明詩、馮盈盈及Juliette，以「師姐教路」做主題，為Juliette平反、講好說話，都係想平息網民的罵戰。 麥明詩、馮盈盈以過來人身份表示，選完港姐都有大單嘢發生，例如被人話有黑幕、靠山。當年麥明詩奪冠後都被批「說話離地離到上太空」；馮盈盈則被翻以前爆粗評論政治，佢就話：「香港小姐呢份工好難做得好，好明白Juliette喺起步，希望佢從中學習。」 獲選冠軍，Juliette認為評判專業，睇得出邊個有潛質，唔會覺得自己最好，亦不是最差。講返棚哨牙，Juliette已經回應過牙醫男友都覺得佢唔使整，今次佢再公開講：「我咁多年嚟，第一次有人叫我箍牙，知道自己笑容大。」馮盈盈都問佢會唔會考慮去箍牙，Juliette稱：「睇人有咩意見，我其實唔想箍。」馮盈盈靈機一觸畀意見：「可用牙做標誌，球星大、細哨都係咁俾人分。」認真搞笑。至於被網民惡搞及改圖，Juliette則看得開讚有創意、好好笑。 提返Juliette前日在instagram開直播全程用英文講嘢、更直言唔會浪費時間翻譯中文留言，對於被指有富爸爸，Juliette話相信媒體報道的網民「不夠聰明」。佢今晚重申當時的說話：「我講中文唔好，我知好多人唔鍾意，我講得唔好，會努力學。用英文係唔想人誤會我，我唔係唔Care中文，比賽前叻哥（陳百祥）都有畀意見。直播我講not well-educated，新聞有啲係錯，估唔到Media可以扭曲我講嘢，我會學好中文去表達自己。其實想人知道我係邊個、態度係點先評論，唔好唔公平。最傷心係有留言『我希望你一家人可以死』，估唔到可以咁Bad。」 Juliette仲話見爸爸雷葆文被指有米，佢當時都問爸爸係咪有事隱瞞，點解自己要辛苦打工畀學費，並親口認爸爸曾經係香港十大設計師，不過家境有唔同，唔似報道所講咁叠水，亦唔係買冠軍。馮盈盈又幫口：「錢買得起就好，冇咁簡單。」 講返參選過程，馮盈盈有睇住Juliette的表現，比賽當日更是由早到晚搞到人都攰爆，不過見住Juliette依然有活力、值得有冠軍。Juliette亦以「10姊妹」稱呼參加決賽的佳麗，坦言：「Kelly好靚女，10姊妹諗最上鏡小姐係Emily（黃瑋琦）或者Kelly（伍樂怡）拎，估唔到係我，當時好驚訝，可能以前做過Model有幫助。」