【奪冠惹罵戰】雷莊𠒇信心爆棚懶理惡評 馮盈盈奉勸謙卑兼學好中文

出爐港姐冠軍雷莊𠒇（Juliette）面對大批網民的惡評依然自信爆棚，真係充滿正能量。之前她開Live講過唔會嘥時間翻譯中文留言、會學好中文、自己有其他特質代表到香港。不過未花時間學中文前，Juliette都係鍾意用英文表達意見，今日她發長文再次強調好開心、充滿自信，唔會理會負評如潮。 Juliette感謝香港及加拿大的支持者，話唔少人浪費時間去批評她不值得拎冠軍，樂觀的Juliette講足3次「fine」再加多個「wooo!」，自High表示感覺良好。她自認不是弱者，會為自己發聲，並不厭其煩講返上次開Live講過的心聲，如「我不會去討好人」、「知道自己價值所在」；Juliette又感抱歉，要支持者為她抗爭去回應「sick comments」。 講到未來去向，Juliette自言會留港一年履行港姐的任務，理想是去荷李活發展，並自稱好國際化；她坦言來自加拿大，不過香港才是她的根。自從Juliette摘后冠後，逢出Post都引起罵戰，今次網民又爭相留言，有人為Juliette加油又讚靚女，有人質問「唔識中文點做香港小姐呀？」、「全城罵你卻只喺自己小圈子享受所謂的榮耀，我係你會收聲」、「學習同謙虛完全睇唔出」。 另外，上屆港姐冠軍馮盈盈在日前的競選後與Juliette合照，她Post相兼勉勵Juliette「堅持自我，總會有人欣賞到你的，同時要把每個難關當成磨練的機會，懷著謙卑的心從中反省自己改進自己」，馮盈盈又Hashtag「#其實我諗過用英文寫 #但香港小姐應該要明白中文的重要性 #唔緊要 #唔識咪學到識 #有咩不足咪做到好為止 #無人完美 #肯努力做好自己先最重要 #有壓力就有成長 #期待之後的美麗蛻變 #加油」。看來知道Juliette惹來網民噓聲的馮盈盈，都奉勸小師妹要「謙卑」加學好中文。