【港姐】網民嘲雷莊𠒇似細哨 接任演癲姐

《2017香港小姐競選》今晚落幕，雷莊𠒇、何依婷、黃瑋琦分奪冠亞季軍，網民留言最好睇，對於8號伍樂怡大熱倒灶，不少網民都話好失望，並心水清地直指泳裝答問環節中，冠軍雷莊𠒇同樣表演麻麻。有人話「8號雖然答得唔係咁好，但5號同樣唔得，8號索顏好，只是今晚比較緊張」。再有網民力撐五強止步的伍樂怡，「希望8號可以有劇拍，做到呢行」、「佢個樣係咁多個入面最有星味」、「8號越睇越靚，竟然三甲都無」。 對於5號雷莊𠒇成為新一屆港姐冠軍，網民都話意想不到，笑指雷莊𠒇棚牙太哨、講中文又麻麻，「5號連中文都唔識，仲話住咗香港10年」、「5號今晚好sharp夠台型，由出場開始佢每套衫都係最靚最搶眼！但佢個樣我真係唔識欣賞！」、「細哨攞冠軍，真係咁都得」。 有網民更搞笑指雷莊𠒇似足《踩過界》中，「癲姐」蔡思貝的哨牙Look，提議《踩》劇添食可找雷莊𠒇做癲姐，因為唔使戴假牙。另外，五強換上晚裝出場聽三甲結果時，穿上藍色透視裙的雷莊𠒇比起著粉色裙的佳麗明顯突出，令網民懷疑造馬，「人人著白色衫...只有5號著紫色衫..企中間位」、「實質就全部都係事先安排好晒，內定晒」。 另外，宣佈4號黃瑋琦奪得季軍後，又改由星級導師鄭裕玲（嘟嘟姐）、草蜢、宣萱等人選出冠軍，成個過程似足街市買菜。有最後話事權的嘟嘟姐更問現場觀眾睇好邊位佳麗做冠軍，任觀眾大嗌。網民因此表現嬲豬，「咩都鄭裕玲最後話事，咁不如淨係佢一個做評判算數」、「真係一年差過一年，最恐怖係佢又要做到懶民主懶開放咁，最後有得決定嘅人相信都唔係當下果一刻決定，而係事先已經知道」。