伍樂怡落選直言Surprise 贏網民歡心最緊要

港姐競選昨晚落幕，賽前大熱之一的伍樂怡（Kelly）五強止步，一個獎都冇，網民表示好可惜，希望Kelly仍能入行做藝人。那邊廂有冠軍雷莊𠒇（Juliette）開Live為自己發聲，唔介意被批醜樣，全程講英文；這邊廂的Kelly與賽前已被淘汰的胡美貽（Nicole）開心食甜品，二人全程主要講中文，Kelly話噚晚完咗比賽好攰，返到屋企即瞓覺，今朝瞓醒發現有好多網民在社交平台窩心留言支持她，所以開Live同網民傾偈多謝大家。 講到個賽果，Kelly直言：「有少少surprise，不過都唔係為咗攞獎，志在參與，我唔會唔開心。我戥Juliette開心，因為佢好叻跳舞，有不足的地方會教我哋，佢得獎好戥佢開心。」網民問聽到入唔到三甲咩感覺？Kelly回答：「係冇感覺，返去後台囉。我知道好多人覺得冇獎好可惜，不過比起你哋（粉絲），你哋重要好多。」Nicole亦搭嘴：「已經贏咗啦」。 有人叫Kelly再參選，她與Nicole同聲同氣指：「唔會再參選，其實好攰，喺台上面用好多精神，依家幾好，想出街就出街，食嘢就食嘢。」Kelly更向網民徵詢落選後有乜好做？有人提議做YouTuber，Kelly亦大感興趣，想同Nicole拍住上：「做KOL幾好，網上平台幾自由。我可以開個YouTube Channel示範整甜品，改咩名好呢？用返ngkelly_呢個名。」