張繼聰孖囡囡玩自拍 可愛張靖嘔奶搶鏡

今日星期日好爸爸張繼聰唔使開工，可以留在家中享天倫樂，尤其要同前世情人張靖（Karina）增進感情。家居Look的張繼聰抱住囡囡玩自拍，開心分享B女的可愛樣，Karina仲好叻女識得望實鏡頭，加埋自拍app的效果，有心心箭射去Karina紅卜卜的面珠仔，難怪張繼聰表情多多，忍唔住錫囡囡一啖。 另外一段片就非常爆趣，一臉淡定樣的Karina瞬間嘔奶，嘔完個嘴仔仲殘留奶奶，不過Karina依然表情無變，繼續望鏡頭。爸爸張繼聰見到此情形，就笑得勁開心，並留言「小朋友永遠都有搶鏡嘅絕招」。 段片有逾萬名網民Like，有人搞笑留言：「B女話，我搶到鏡啦」、「公主一出手就冇得輸了」、「因為Daddy型到嘔」、「真的好cute，嘔奶都嘔得咁可愛」。 另外，張繼聰上星期到加拿大開騷，全場接近5千座位爆滿，令已有兩年沒開騷的張繼聰非常開心。雖然去加國的行程非常趕，一落機就趕去綵排，一完騷又即刻回港，但他依然enjoy。鍾意唱歌的張繼聰表示暫時以電影工作行先，亦考慮日後再出唱片。