囡囡著靚靚飲衫好得意　張繼聰晒女：我開始有分享症

自從前世情人張靖出生後，身為爸爸嘅張繼聰周不時都忍唔住分享囡囡嘅可愛相，變成「晒B狂魔」。張靖話咁快就嚟4個月大，愈大愈似哥哥張瞻，兩兄妹餅印樣。今日張靖打扮靚靚，頭戴白色喱士紗巾，著上白色衫仔去婚禮，相信一身裝扮都係出自媽媽謝安琪諗頭。

見到囡囡「戰鬥格」上陣，又笑得咁Sweet，爸爸張繼聰又頂唔住上載美圖，並留言：「人仔細細去人婚禮，想冧死Daddy咩？ .....我諗我...開始有囝囡分享症」。網民一律讚囡囡可愛、迷死人，所以原諒張繼聰化成狂魔騷囡囡相，仲催佢開心分享更多得意照片，冧吓大家。