【梁浸浸玩善變】鄭希怡驚覺囡囡識整蠱人　阿Sa：佢似俾你恐嚇

鄭希怡（Yumiko）一家三口日前去泰國度假，食好嘢、睇水族館，加上天時暑熱，Yumiko唔少得帶埋囡囡梁浸浸去玩水。Yumiko亦不忘晒水著相騷性感，梁浸浸亦唔惹小，晒肥嘟嘟身形，去旅行食多咗唔少好嘢都係人之常情啫。為囡囡安全著想，Yumiko幫梁浸浸著上童裝救生衣落池玩水，認真重裝備，鍾意玩水消暑嘅梁浸浸仲每日最少玩水4個鐘 ，小朋友果然充滿精力。

另外，Yumiko趁囡囡擦牙仔時撩傾偈，問梁浸浸「聽日玩唔玩水？」、「想唔想返香港？」、「食唔食雪糕吖？」梁浸浸一律笑住擰頭又點頭，搞到Yumiko驚覺：「我嚴重覺得妳開始整蠱我啦 #刷牙talk #happygirl #女人係善變 #估唔到妳咁細個就有呢個特質 #邊個教妳開始整蠱媽咪」。好友蔡卓妍（阿Sa）都加把嘴：「佢似係俾你恐嚇多啲」。