修身復出？謝安琪應承囡囡畀心機運動：以前我唔係咁圓轆轆肥嘟嘟

謝安琪（Kay）誕下細女張靖（Karina）後，一直留在家中湊女，加上要餵母乳，早已講過唔減肥住。Kay產後圓轆轆未修身，近日終於訂下減肥大計，今日她在社交平台上載Gym房相，囡囡Karina架BB車都入埋鏡，為付出汗水的媽咪打打氣。

努力減磅的Kay搞笑留言：「KaKaBall❤你真乖豬，特登嚟Gym為我打氣。靜靜話你知吖……其實我以前唔係咁圓轆轆肥嘟嘟嘅……好！我應承你，我會比（畀）心機做運動，康復得更好。等你大個啲，我叫爸爸同哥哥教你玩好多好玩又健康嘅運動好嗎？ #有位運動狂爸爸有好多野（嘢）玩 #哥哥也很愛運動 #如果你用在媽咪肚裏日夜狂踢果（嗰）種拼勁運動應該會有一定成就」。 唔止Karina親身去撐Kay，網民都留言打氣，「畀心機呀，好欣賞妳唔介意自己略胖，都以BB嘅需要同健康為首先」、「Kay媽加油呀」。同時有網民期待Kay為復出修身，為歌迷出新歌、唱好歌。