古天后日誌｜港股結算前料窄幅上落

11月27日，天晴，天氣乾燥，日夜溫差較大。美股上周四有三日半市，但仍造好，市場相信本周公布嘅PCE，即聯儲局視為通脹指標嘅美國個人消費平減指數，或決定美股至年底前能否保持升勢嘅重要參考指數。

美股延續前一周升勢，整體氣氛喺大部份標指企業季績理想嘅因素支持下，三大主要指數均錄得約1%的升幅。至於本周焦點為多個經濟數據，尤其周四公布嘅10月份PCE。如果呢個數據一如預期，料可反映通張受控，回落之勢持續，稍後有望回落至2.5%至2.6%，逐步接近聯儲局2%通脹目標，美國經濟軟着陸可能大增，利好美股後市發展。如就業市場進一步放緩，聯儲局明年就有空間減息。

根據過去幾個月數據，反映美國銷售回復正常化，但家庭開支上升，令購物態度仍趨向保守。據Best buy數據，顧客仍減少購買非必需品及高價值產品，銷售額下降最多分別是家電、電腦、影音器材及手機等。

至於港股表現確令人失望，今次反彈多受美股回升影響，但通常是夜期跟美股升，回來高開後受A股下跌，又再回落，結果整個11月都在17000至18000之間上落，最大問題仍然係場內資金面薄弱，不過當回落至17000低位則見有少少錢入場買嘢，但高追免問，仍是低位儲貨格局。

事實上，港股跌至低位，大戶需要時間買貨，加上外資撤離後，目前睇法仍相當保守，即使美元下跌，人民幣回升，亦未見有熱錢流入。反而今年印度、日本股市都有錢流入，就連南韓也有熱錢去買，中港股市表現相當落後。

恒指上周中先升後回，估計係受到美國即將審議《香港經濟貿易辦事處認證法案》消息影響。美國國會眾議院外交事務委員會宣布，將於當地時間本月29日審議相關法案，這條法案早於今年2月由美國國會及行政部門中國問題委員會嘅兩名跨黨派主席提出、涉及本港駐美經貿辦的法案，若國會審議認定呢啲辦事處，唔值得享有目前嘅特權豁免待遇，須於半年內關閉。事實上，香港駐美總經貿專員一職已懸空兩年多，貿發局亦可代替喺當地推廣香港經貿。

人民幣轉強，加上內地政府推出多項支持房地產舉措，帶動港設氣氛稍為改善，恒指上周續升，連升兩周，累升300多點或2%。本周市場需關注內地11月製造業PMI數據，投資者會繼續觀望內地經濟走向；如進一步下行，本周後段可能又會面臨沽壓。至於外圍股市表現平穩，美股保持升勢，炒息口見頂，美國經濟軟着陸。恒指目前乏力突破萬八關口，但大跌風險亦有限，本周三期指結算，估算指數繼窄幅上落的機會不低，正等待內地有進一步政策消息為大市帶來正面刺激。

技術走勢上，恒指喺20日線17550附近爭持，下方守住上月至今上升軌約17350點至17400點支持區較為理想，企得穩的話預料經過此輪反覆上落後，稍後仍有望向上挑戰11月高位18290及100日線18200水平。即市阻力為10日線及5日線，大約為17700至17800水平。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ