獨家丨亨仔 Tsoul「做工佬」齊搞旺個市 《造星V》囝囝開FM共收逾8萬入場費

《全民造星V》播畢後，囝囝們已輪住搞Fans Meeting，本周日（10日）可能係好日，亨仔（陳鎮亨）、Tsoul（田曜誠）及「做工佬」Ritchie齊揀當日舉行FM，合共有320人出席，Fans共奉獻87,200元入場費，加埋Book場、佈置、紀念品、仲有購入大量禮物送畀偶像，人人快樂地促進社會經濟，要搞旺個市其實唔難。三位幸福的偶像都相當興奮，首次舉行FM的亨仔和Tsou讚好Fans搞活動有心思，最開心粉絲撐自己之餘仲做埋朋友。「做工佬」山長水遠來港搞FM兼出Show，留港一周Keep住審計工作Work From HK仲撞正百年一遇的極端天氣，差啲返唔到酒店，超難忘。採訪：廖思慧、杜杜

一向易喊的亨仔當日冇喊過，3小時的活動有好多難忘的感動位。

問Tsoul開FM感受，佢不斷講感恩和感激，又指活動內容雖然簡單，但好溫馨。

Ritchie稱最傷腦筋應該係搵適合嘅場地，同埋申請大館嘅整個過程，「大館好嚴，唔容易申請。」

亨仔的FM由Book場、設計門票到製作紀念品都由fans籌辦，所以到場時好驚喜，單是場地已令他好感觸，「行入去已打咗個突，就係參加大專賽嗰度，諗返之前畀咗幾百蚊報名費，但第一round都入唔到，哈哈！𠵱家竟然有咁多Honey（粉絲暱稱）聽我唱歌，算係踏出成功嘅第1步，好感恩。」另外亨仔亦邀請了《造星V》兄弟Tiger Foo、Anson Wong和 Kim任嘉賓。

 

首個FM令亨仔相當難忘。

亨仔邀請兄弟做嘉賓，「冇騷錢，哈哈！真係好感激佢哋。」

亨仔邀請了好兄弟Anson Wong做嘉賓。

亨仔大讚fans整個活動安排得好好，紀念品亦整得好靚。

亨仔鍾意收信

當日有100位fans出席，每人250元包飲品兼有手繩及Tote Bag禮品包，亨仔開心出席者好多都熟口熟面，「有啲Honey真係每次都嚟，咁鍾意我好感恩，冇Honey就冇我，希望遲啲搞音樂會回饋返佢哋，亦感激admin，souvenir同佈置都整得好靚，真係好有心機。」當日亨仔戴住fans整的手帶又着住fans送的襪出席，對Honey親手整禮物給他表示感激，又稱收信已好開心，「唔想大家使咁多錢整嘢或者買嘢畀我，畀信同我傾偈好過，寫字唔使錢，係無價。」

 

亨仔玩遊戲時笑得好開心。

亨仔家人及女友都有出席，「我老竇（右一）上台影相，好似總統選舉咁揮手，真係笑咗，feel到佢好enjoy，哈哈！」

亨仔在FM跟Honey逐個傾偈，已認到樣，但記名要花啲時間。

每位參加FM的Honey都會收到手繩加Tote Bag的紀念品。

亨仔戴住Honey整的靚手帶。

FM紀念品之一的手帶刻有HJ HONEY字句。

設計好精美的門票。

亨仔著住Honey送的襪仔。

應援物超靚，包括結他PICK鍊。

第一次FM紀念牌。

前有相後有字非常有心思。

仲有大量靚靚印刷品包括年曆。

 

 

Tsoul加油紙條

Tsoul的FM冇嘉賓，純跟Soulmate（粉絲名稱）傾偈玩遊戲，「希望大家打成一片，所以呢個係friend\'s meeting，第1次搞已經出席嘅真係我朋友，fans因為鍾意我成為共同話題，仲做埋朋友，真係好神奇。」

有份參與籌備FM的Tsoul，沒有經驗下覺得相當困難。

Tsoul承諾下次FM一定會準備表演。

心情興奮的Tsoul，不時有趣怪表情出現。

FM被稱為社恐集會，Tsoul解釋：「鍾意我嘅有部份比較內歛，加上大家第1次有啲緊張，純粹講笑啫！」

雖然收費300元的FM冇表演睇，但Tsoul會跟30位Soulmate玩遊戲玩足2個鐘，亦準備了很多有心思的禮物用來抽奬，「我買咗5份小禮物，係我鍾意嘅零食，另外仲有5份，分別有兩份我鍾意嘅星之卡比公仔；由細到大都鍾意嘅超人迪加公仔，佢代表光，好適合呢個世代，提醒佢哋自己都可以成為光；另外仲有打氣意味嘅畫；最後係復活島摩艾石像嘅加濕器，哈哈！呢個實用少少，禮物仲附有我寫嘅加油字條，希望幫大家打氣。」

FM Promo好可愛。

Tsoul跟Fans不斷傾偈及合照，近距離接觸滿足他們要求。

因party room限人數，只能安排30名soulmate出席FM，Tsoul承諾會再搞。

Tsoul好勤力簽名，做功課一樣。

Tsoul親自選購禮物送fans，還加上心意便條好有心思。

Tsoul感激Admin冇經驗仍努力籌辦FM，見到印有自己個樣嘅紙巾覺得好匪夷所思。

好靚嘅應援物。

做工佬超錫Fans

Ritchie第二次搞的FM叫放映會，自彈自唱之餘，仲同190名工友（Fans暱稱）齊睇7月舉行的首個FM精彩片段，全程3小時，盛惠280元，好抵玩。另外，為爭取更多時間同工友互動及影相，所以冇請嘉賓。問到工友點解拎住「遲」字牌影大合照，做工佬笑言，「Ritchie個 chie 同 『遲』 讀音一樣，所以就想有個『遲』 字牌，外人見到會好奇點解咁多『 遲遲遲』。」做工佬留港一周撞正百年一遇的極端天氣，「FM前黑雨，我哋練歌練到一半，突然有人好緊張咁敲門。出去睇原來成層樓已經開始水浸。所以我哋停咗練歌，之後一直睇新聞，睇吓要點離開。」除了練歌的Band房水浸，當晚冇巴士冇港鐵，要由新蒲崗的Band房返回灣仔的酒店好難搞，好彩有工友，「佢哋幫我call到車，仲教司機經西隧返酒店。」

Ritchie當日唱咗好多歌，包括《下雨天》及《Always Remember Us This Way》等。

做工佬話:「根據工友上一次FM嘅回應，好多人都鍾意聽 《下雨天》，所以當場又唱咗一次。」

Ritchie覺得遲字牌又chill又搞笑，好適合pantry (Fan Club名稱)。 工友的確健談又Funny，話題超多，尋日喺TG Group討論薯片，認同熱浪最好食。

做工佬FM後感:「今次係覺得特別感動，感恩和欣慰，有咁多支持我的人，同埋好多好可靠嘅人在我身邊幫我，與我一起解決問題，度過難關。」

呢張相好似有聲咁。

FM有睇片環節，可以同190名工友睇返第一次 FM 嘅精彩片段，Ritchie覺得好感動。

相中是7月的FM片段。

問做工佬當日Rundown，佢話:「一個鐘放映，一個鐘唱歌/互動/聊天及一個鐘跟粉絲 photo time。」

水侵Band房樓層。

黑雨下綵排。

多得工友幫忙，做工佬及Jason Loi等先可以平安離開返酒店。

FM前一日，做工佬出席水上樂園舉行的《TrendyToo SPLASH!》。

 

FM除有女工亦有男工參與，Ritchie笑言唔算預料之外，因為佢都有好多男偶像，叫佢講三個男偶像名稱佢話太少要講夠五個「好似林宥嘉、Bruno Mars、Taeyang、林俊傑及方大同等等，希望未來可以用歌聲和實力去吸引更多真心欣賞我音樂嘅fans。」

全力寫歌和籌備新歌MV出爐的Ritchie對完成第二個FM特別感恩，「因為有好多支持我嘅人，同好可靠嘅人幫我。」

年紀最小的小工友Hailey攬住做工佬，「上次喺太古坊 busking 已經見過一次，好得意，印象好深刻，同埋佢自己畫的 fan letter 都超有心。上次兩日嘅 FM佢都嚟唔到，所以今次見到佢我真係好 surprise 同開心。」

做工佬籌備FM超過一個月。

在FM收到好多信。

亦收到好多禮物。

工頭好開心好感恩。

 

《星島頭條》新網站有更多精彩內容：http://www.stheadline.com/