獨家丨Tsoul玩《造星V》講真心話被DM「問候」家人冇嚇親照講心底話：唔可以冇咗自己

2023-09-11 06:00

《全民造星V》播畢近兩個月，眾囝囝仍然活躍，第五名的Tsoul(田曜誠)將於17日聯同15名本地街舞精英出戰殿堂級街舞大賽《Red Bull Dance Your Style》，勝出將代表香港到德國打大佬。決心做跳舞明星的Tsoul為人坦白，做訪問乜都講，錢銀、女友、家庭、更首度公開澳門節目事件被圍插後心情。問到深潛多時的Nathan近況，明顯嚇親的他停頓6秒，腦筋快速急轉，答到問題又唔怕得罪老友，論口才叻過好多《造星》師兄，入行冇問題啦。採訪:廖思慧，杜杜攝影:Stanley 場地:Boogie Renaissance Studio

Tsoul希望香港跳舞界可以變成一個工業，「健全程度好似日本同韓國，甚至超越，係一個願景，希望十年後有呢個成就，同埋帶領其他人有呢個成就。」

《Red Bull Dance Your Style》主辦單位稱Tsoul好出名，《造星V》前已邀他參加比賽。

因為比賽玩Freestyle，Tsoul說好講平時練習及心理質素，但都會注意飲食，再練大隻啲。

街舞好神奇一跳愛上
Tsoul由中五開始跳街舞，一跳12年，「跟同學一齊跳，比人笑咗成年，話我跳舞樣衰，當時考DSE，上堂成日郁身郁勢（即場示範)，梗係比人笑傻仔。」至於點樣接觸跳舞？Tsoul講到好好笑，「當時元朗有條街有一個Popping 嘅exhibition battle，一開始乜都跳，有少少呃錢Feel，個導師跟我跳兩吓，就走咗去第二度，隔咗半個鐘嚟望吓你，得啦，掂呀。」感覺瀨咗人嘢的Tsoul再認識到Popping 老師，「叫Yellow，我第一個老師，好勁，本身覺得首歌好難聽，但佢跳完之後我覺得首歌好好聽，呢個係街舞神奇嘅地方，Dancer可以令你鍾意首歌，好神奇，所以入咗坑。」至於學費？「好似300蚊四堂，用零用錢交學費。」

Tsoul(左三)開始跳舞就不斷參加比賽，「完全唔入流，不過，老師由細到大灌輸，輸好平常，都唔記得輸咗幾多次。」

Tsoul在2011年於新手Popping Battle首奪亞軍。

聽到自己歌聲好Kick

Tsoul仍不時翻睇《造星V》，最鍾意決賽的兩個Item，問到最唔想記起項目？他大笑兼笑唔停，「40強嗰兩個都唔想睇返，一聽自己唱歌起晒雞皮，決賽唱反而冇呢個感覺。」因為同Lokman對唱Rap更唱出樂趣，「原來唱歌係正㗎喎。」60強的《和平之前》亦是最愛，因為大壓力加上婆婆離世，坦言當時真喊，兼鏡頭後喊足45分鐘的Tsoul對演戲亦有新感覺，「學識點樣收放情緒，做慘情戲幾有Feel。」偶像是星爺及鄭中基的他覺得近年好少港產喜劇，想做跳舞明星之餘亦想向喜劇演員邁進。問到會否去學戲？他答得坦白，「想呀，但唔夠錢。」提他秋生開大師班，他苦笑，「好貴呀，Rosa(韋羅莎)都唔平呀。」

Tsoul一講到40強兩個item已經狂笑。

Tsoul最鍾意決賽的兩個Item之一。

Tsoul同Lokman對唱Rap唱出樂趣。

Tsoul唔敢睇返《窮人的薔薇》，因為頂唔順自己把聲，聽到起晒雞皮。

玩《造星V》太忙，Tsoul冇機會釋放婆婆離世的情感，好彩有《和平之前》俾機會佢爆喊。

每日使費寫落簿仔
之前Tsoul跟本報透露玩《造星V》使盡6位數積蓄，KC只是用了5萬，問到條數點計？他即苦笑，「我係婆仔，乜都計晒落去，唔係Mark落手機，係寫落簿仔，每日Mark低食飯幾多錢。」因為全力投入玩比賽，Tsoul停晒所有搵錢Job，「就算冇收入都要畀家用，自己搬出嚟住要交租，KC都要交租，佢扮嘢啫，點止5、6萬呀，比賽好多嘢要墊住先，好似我20強AI個死人箱都整咗4、5000蚊，大佬呀，容乜易10皮啫。」坦言教跳舞及做Dancer搵唔到食，因為唔穩定加上性格問題，好早已有儲錢習慣，「Make Sure唔好使多過要儲嘅錢，特別有返全職嘅時候，嗰份糧用嚟生活，畀家用，找咭數，額外DJ，教跳舞班就全部儲晒佢，而家啲錢全部用嚟生活，儲唔到錢，更加要記住。」

Tsoul之前在網媒做Marketing Manager ，大小事務乜都要做，KOL Management 、Production 、接生意、跑數等，總之乜都關佢事。「17年到22年，有正職，放工跳舞，教班，周五六，教完班就打碟，六日有活動去打碟或玩比賽，維持四、五年，Marketing份工好Free，再之前好Reguler，冇自己時間，完全奉獻畀跳舞。」

喺20強的《智能 (AI) 叛變》中，Tsoul企喺佢口中，整咗成5千蚊的死人箱中。

睇《造星V》開頭，見到Tsoul同樂樂拖住手等出場，好疑惑。「我哋拍MＶ係同組，嗰時FＤ咗，我哋互相欣賞，一齊入６０強，之後入咗兩邊唔同組就少聯絡。」

跳Popping搵唔到食
問到香港教跳舞搵唔搵到食？Tsoul九秒九回答，「搵唔到，睇你邊個範疇，可以細分ＫＣ叫commercial ，我係Underground嗰邊，佢哋嗰邊好啲，因為有好多公開嘅排舞Job，MV呀，演唱會，Annual Dinner，我哋呢邊真係齋跳，玩比賽都係得千零蚊獎金咋陰功。」，Tsoul有感而發，「比賽最多贏名氣，冇乜錢，造星前，Popping堂都唔多人上，一嚟難，雖然好型，二嚟要時間，要跳到好似我咁型，（哈哈）講笑啫，正常要成型都要二至三年，除非好努力。」20強時的AI項目，有個女仔同Tsoul一齊跳，「佢跳咗五，六年已經搞成咁，再跳多十年仲得了嘅。」

Tsoul再三強調教班人工只能當零用錢。「DJ又好搵過教班，去娛樂場所打碟，按小時計，可觀嘅，一定多過教一堂，付出一至兩個鐘，但辛苦啲，夜晚打碟又要應酬，唔係打完就走，要建立人脈關係，同人飲吓嘢傾吓偈識吓人，當然之前疫情就GG。」再問同ＫＣ教班的學費會否有好大分別，Tsoul稱大同小異，「佢哋易於吸人，一嚟幾打人咁上，對啱啱學跳舞嘅人易啲上手，跟老師Step做，我哋要由淺入深，肌肉點樣，條頸點郁，教Jazz Funk，Kpop就更加搵錢。」

打碟好搵過教班，但成日要應酬都好攰。

Pop your street 2023 Popping 冠軍

Diggin街舞運動會 2022 Allstyle battle 冠軍

大舞會2023 Popping battle champion

20強時的AI項目，Tsoul大讚一齊跳的女仔未來不得了。

父母只希望佢開心
因為用盡積蓄，Tsoul完比賽後努力教Popping及做DJ搵錢，以為有知名度後搵錢會易少少，原來唔係。「係多咗人上堂，以前頂盡10個人，而家每堂20幾個。」由於打工關係，並非私人教授，學費都按返之前Studio收費所以並冇提高。首屆《造星》，Tsoul剛從台灣畢業回港，對之後數屆僅限於睇跳舞朋友的表演項目，至《造星IV》見到Gao的熱血被衝擊，上年辭去Marketing Manager工作全力衝跳舞兼參加《造星V》。雖然是家中獨子，但家人並冇反對Tsoul以跳舞作職業，「父母只想我知道自己做緊乜，同埋開心，Settle最基本嗰Part就唔會阻你跳舞，老竇同我講，冇諗到我玩《造星V》玩到咁後，好零尊(笑)，佢好proud of我。」

Tsoul稱好多新面孔上堂，冇跳過舞，或者睇完《造星V》想學popping。

因為睇《造星IV》見到Gao玩得好熱血，Tsoul被衝擊到決定辭職比賽。

接受唔到人生攻擊
Tsoul同現任Dancer女友拍拖一年，「我冇收埋啲相㗎。」他笑言跟前任分開後決定唔再同跳舞人一齊，「好煩成日都見到，點知下一個都係，圈子好窄，講真，活躍街舞比賽嘅，十年都係嗰啲人，唔係A就B，可能A又同過B一齊，好多呢啲情況。」因為澳門節目事件，Tsoul社交平台被黑雨式圍插，導致決賽夜觀眾投票急跌無緣入三甲，事隔兩個月，Tsoul首次透露當時感受，「好記得即刻打畀安仔同陳蕾，『搞咩呀？』好莫名，點解嘅？係我角度，我冇做錯過任何嘢，好客觀咁陳述返件事，剪接上冇呈現晒，咁呢個我控制唔到，我覺得，喂，我喺節目做咗咁多嘢，又冇做錯乜，但你攻擊我，仲要攻擊埋人格，有啲會DM鬧我屋企人，好難受。」問到會否怕咗入行？「又唔會，做呢行一定要識講嘢，但唔可以冇咗自己，要講心裡面嗰句嘢，你唔鍾意都冇辦法，我控制唔到其它人。」問到有無搵過深潛兩個月的Nathan?一直輕鬆答問題的Tsoul嚇一嚇，停頓6秒冷靜反問及回答，「會問呢啲㗎咩？有搵嘅，安全嘅。」