獨家丨《造星V》冠軍Lyman靚老婆Zoe甜爆老公秘密 Tsoul使盡6位數積蓄 王鋒恨入男團未簽ViuTV

是非絕對是歷屆之冠的《全民造星V》終於圓滿結束，由零負評的民選NO.1香胤宅（Lyman）大熱奪冠，其太太Zoe當然有到場，《星島頭條》邀請笑容好Sweet的香太傾幾句，超Nice的她有問必答，更大爆老公比賽以來的有趣小秘密､兩人的浪漫史，以及Lyman左耳聽力有問題的原因。最重要美國回港後Zoe即去小店攞應援撐老公，決賽日又煲愛心靚湯送畀十強，又靚又暖同Lyman襯到絕。另外，決賽排名分別第5及第8的Tsoul（田曜誠）及王鋒為接近7個月的比賽使盡積蓄，兩人均強調非網上所傳已跟ViuTV簽約，只認有傾過偈。採訪:廖思慧、杜杜   攝影:Stanley

問到有否獎勵畀Lyman，香太笑言，「獎佢食一包薯片，佢好耐無食，佢好鍾意食零食，」Fans送禮又多個選擇嘞。

香太拎的燈牌由Lyman家人訂造，設計精美不過都幾重，另外還有Lyman樣的小袋仔。影相前，香太見到地下有個膠樽，佢執起唔想跣親人，人真好。

香太真人Young過上鏡，仲有啲似《膠戰》嘅Hillary 。

Lyman在總決賽的兩個ITAM變化好大，特別係第二個，香太原來都有畀意見。 「佢自己好有IDEA，一開始想做某幾首歌，從中再揀，我就會建議呢兩個比較好，所以先會向呢個方向。」

對於Lyman留港發展，香太甜笑表示 ，「如果有人OFFER，大家都想睇佢，我都會搬返嚟支持佢，喺呢邊工作。」

Lyman Fan Club搞得好好，好多地方都可以拎應援，香太一返港就去幫襯小店兼拎應援。

Lyman 喺多個訪問提到老婆識煲湯，所以香太一返香港就行街市。

香太煲蘋果雪梨水畀十強，「Lyman提過好多次，太太識煲湯，又話太太返嚟，就煲埋畀十強飲(扮埋聲)，好想幫佢實現，同埋真係想為大家打氣。」

香太好有心機，每樽雪梨水都連埋一張小咭，Taco收禮好開心。

Snoopy張小咭寫住紳士風範的Snoopy。

Lyman的IG Followers 由首播的1,698去到最新52300，全靠Zoe幫手報名，今屆《造星V》才有如此高質的參賽者，Fans都話好多謝香太，對於老公奪冠，她說:「好開心，好感激支持者，冇佢哋，相信Lyman都唔會去到呢個名次。」香太表示跟老公在美都是Artist，只要有機會展示Performance，去邊都無所謂，「不如試吓，佢話幾好喎就報咗名。」她又稱對名次一直抱平常心，「最重要佢做咗佢想做嘅嘢，又Show畀大家睇，佢屬於舞台。」對於愈來愈多的Lyman Fans ，香太好感激，「感激大家對佢嘅愛，真係好體貼，好用心去製作好多應援，頭先都去咗佢哋嘅BOOTH打招呼，佢哋都好熱情，真係好多謝你哋。」

 

Lyman的IG Followers 由首播的1,698去到最新52300。

香太好感激Fans對老公嘅愛。

跟Lyman結婚三年的香太都是藝人，同樣參與過百老匯的演出，參與的作品《Fishbone》入圍各大電影節。

除了演戲，香太都會接MODEL工作。

香太都有放片上YouTube。

BB Lyman發燒影響聽力
香太透露Lyman每次度完比賽項目都會問佢意見，「有咩好同唔好，再一齊improve。好鍾意20強嘅《imPERFECT》因為可以畀大家深入了解佢內心。」提到Lyman好堅強，節目中完全未見過佢喊，香太坦言，「其實有㗎，去到20強都表露咗好多心底嘢。」Lyman在決賽中首度公開聽力有問題，香太大方補充，「佢BB時期發高燒導致左耳完全聽唔到，唔會影響學語言，因為由細到大都習慣咗，如果同佢講嘢聽唔到，真係唔好意思，佢唔係特登。」她又讚老公，「佢本身好多Energy，從來冇因為呢樣嘢自卑。」

香太坦言冇睇晒《造星V》，但老公嘅全部睇晒，最愛20強的《imPERFECT》。

香太稱Lyman BB時期發高燒導致左耳完全聽唔到。

比賽中期Lyman公開已婚，更曾在本報訪問稱太太是中學同學，由於當時矮過對方又嘈，Zoe眼尾都無望佢。之後兩人在英國大學重遇，拍拖12年，結婚3年，香太笑言，「佢發育比較慢，細個比較矮，之後有飆高，由細到大都紥紥跳，好大聲，嗰時覺得佢幾得意，但冇話特別有興趣。直至去英國讀大學，大家都成熟咗少少，佢又變得靚仔咗少少(笑住講)加上有好多共同興趣。」對於Lyman留港發展，她說點都會返香港陪老公。

香太的社交平台有大量跟Lyman的合照，拍拖一周年的兩人，好Green呀。

拍拖五周年。

拍拖六周年。 ​

拍拖七周年。 ​

拍拖八周年。 ​

拍拖八周年。 ​

拍拖九周年。 ​

拍拖九周年。 ​

拍拖十一周年。 ​

拍拖十一周年。 ​

拍拖十二周年。 ​

香太於今年4月曾短暫返港陪老公比賽，Lyman百忙中都有陪老婆去主題公園玩。

香太稱Lyman 有講過自己壓力大，「但我相信咁多位參賽者去到呢個階段都必定有壓力，受到大家嘅影響，一路同佢討論，聽佢意見。」

王鋒想入行未有公司搵
王鋒在決賽夜得6分排第8，雖然是尾二，但他好滿意，更自評有85分，特別滿意Solo部份，至於兩個表演都選唱英文歌，他說，「聽得多英文歌，同埋locking源自黑人文化，好想返去最原始感覺。」笑晒做訪問的王鋒承認已調整好心情，「之前收到好多負評，有壓力，身邊人為我打氣，慢慢搵返初心，知道自己實力喺邊，建立咗自信。」王鋒估計為比賽使費至少有5位數，坦言未埋單所以唔敢諗。最希望組男團出道的他，仍未收到任何公司電話，當中包括ViuTV，「真係未，所有約都未簽，如果有就好啦！」他最希望加入電視台，「覺得電視台接觸層面廣啲，除咗唱方面，仲可以拍劇，又有綜藝節目玩，可以旅行，如果去澳洲就好嘞！」

王鋒覺得上大舞台造型唔慳得，除用大會提供的服裝外，更自資5位數加碼改造服裝。

王鋒跟Marf的表演有蛇的元素，他提議髮型師將頭髮整濕。

王鋒比賽期間因為改舞步搞到萬箭穿心，終於完成比賽，心臟變得強大的他終於識笑。

王鋒承認賽前壓力太大，每晚瞓3個鐘就醒，比賽結束最想瞓個好覺。

因為歌衫太貼身，王鋒怕凸腩，表演前未有食嘢，完騷最想去打邊爐。

雖然就快掛八號風球，王鋒都去會合Fans影相。

 

 

Tsoul眼濕濕講Nathan
Tsoul最終得14分，第五名完成比賽，他很滿意自己演出，跟同是街舞出身的師兄Lokman同台好幸福，最開心完成夢想演出，「由參賽嗰吓，已想做《Dangerous》向Michael Jackson致敬嘅表演，做到好開心。」評判謝安琪賽後表示很欣賞Tsoul，更想跟他學跳舞，Tsoul好開心，Kay仲親自為他打氣，「佢好supportive跳舞明星呢個方向，竟然會獲得香港咁出名嘅歌手、明星去表示支持呢個方向，我覺得好幸運，本身都好鍾意佢同張繼聰，所以獲得佢嘅肯定更加開心。」參賽7個月極少教跳舞和做DJ工作的Tsoul，得支出冇收入，承認已使了近6位數積蓄。努力向跳舞明星路進發的他，明白跳舞明星需要時間消化，「我當然會唱歌、做綜藝去平衡返，亦希望畀機會我嘅公司都會尊重我，想主力跳舞。」他亦尷尬承認ViuTV曾聯絡，「有傾吓偈咁囉！」

Tsoul打入10強即搵老師學唱歌，總決賽未有大走音已很滿意。

Tsoul跟Lokman用3日時間夾跳唱《INDUSTRY BABY》，又一齊填Rap詞。

Tsoul跟同是街舞出身的師兄Lokman同台，覺得好幸福。

Tsoul集齊香港頂尖Popping舞者跳《Dangerous》，因大家太忙只排了3次。

Tsoul好鍾意ViuTV的造型師為他準備的兩套歌衫，fashion得嚟又突顯到首歌。

 

講到老友Nathan（魏念恩）退賽，Tsoul眼濕濕表示可惜，但會尊重對方決定，更指總決賽前一日綵排已覺對方唔妥，「佢係比較憂愁，但我哋唔係見好耐，冇乜交流。」

對於老友退賽，Tsoul覺得好可惜。

比賽完結，大量粉絲在場外等候偶像簽名合照，圖中為ASH。

《星島頭條》新網站有更多精彩內容：http://www.stheadline.com/