獨家丨「做工佬」Ritchie自資拍新歌MV花絮率先睇《造星V》遺珠未獲ViuTV傾簽約唔心急

2023-08-31 06:30

《全民造星V》終極遺珠，來自馬來西亞，26歲的「做工佬」Ritchie(梁瑋城)在20強輸畀Taco以3比2出局，觀眾在官方Page海嘯式洗版戥佢唔抵。唱到歌又識創作，三個月搞兩次Fans Meeting都供不應求，TG Fans Group人數僅次冠軍Lyman，多人過亞季軍，仲因為鍾意玩Pokémon GO，令一班工友(Fans暱稱)日玩夜又玩。有超強觀眾緣的Ritchie坦言ViuTV冇聯絡傾合約，想留港發展的他唔心急，努力作新歌兼自資在港拍埋MV，冇公司搵咪自己做住嘢先，醒目吖。採訪:廖思慧、杜杜

《Summer Live》當晚要著返數月前的比賽服裝，瘦咗兩個碼的Ritchie笑言，「綵排走出嚟，條褲一直甩，要一直拉住個褲頭。」

Ritchie一埋位自動波擺心心甫士。

送畀工友。

都係送畀工友。

做工佬的TG Fans Group

Lyman 的TG Fans Group

亨仔的TG Fans Group

KC的TG Fans Group

成為《造星V Summer Live 》網上票選冠軍，可以有Solo演出的Ritchie希望大馬香港兩邊走，透露已跟當地審計公司老闆傾過，「點樣可以Work from Hong Kong ?老闆好支持我做呢件事，我哋都諗緊辦法。」

《造星V Summer Live 》網上票選三甲。

Ritchie 在《造星V Summer Live 》唱出18歲時創作的《I Can't Tell》。

問到跟ViuTV傾合約傾成點?有點不知所措的他，尷尬笑言，「其實係冇嘅」，其它公司呢?「都冇」做工佬擰住頭回答。不過佢好識諗，「冇公司可以做自己嘢先，好似MC，參加《造星II》後一段時間先簽公司。」Ritchie表示會創作更多作品，特別會寫多啲廣東歌，「畀公司知道我好有誠意留喺香港，寫多啲作品，多人鍾意嘅，我覺得自然會有公司搵我。」

自己傾Job有難度
講到創作，Ritchie早已跟《造星V》戰友，來自美國的黃哲齊作R&B曲風的新歌叫《雞蛋仔格仔餅》，在《Summer Live 》翌日亦在港拍了MV。「因為我哋兩個都係海外參賽者，想留低一啲關於香港嘅作品，所以一齊喺香港拍MV。」經兩位本地攝影師介紹，MV分別在旺角及香港最紅打卡景點彩虹邨拍攝，朝10晚9，拍足11個鐘。對於MV製作，Ritchie稱參加《造星V》識咗好多攝影師、化妝及髮型師朋友，仲有店舖贊助服裝，「全部有人工嘅，我跟阿哲畀錢，budget 4位數。」

Ritchie稱拍MV如香港一日遊，去咗好多冇去過嘅地方，而MV暫定9月尾見街。

Ritchie睇過韓國女團 loona 1/3 的《love & live》 MV，所以好想去彩虹邨睇吓兼同阿哲拍埋MV。

坐中間的是MV 女主角Christy 。

在旺角拍攝MV時好多途人圍觀，Ritchie坦言有啲怕醜。

《Summer Live 》翌日拍MV，Ritchie掛住同戰友吹水，淺睡一個鐘就開工。

拍攝MV當日天氣唔穩定，去到第一個景點就落雨。

好彩落咗一陣雨就全日好天。

Ritchie並非第一次拍MV，4年前在大馬已有自己第一個自創曲《Only You》的MV。

浪漫得嚟幾好笑。

收到MV片段要補問，叫Ritchie錄音就可以，估唔到佢逐條用文字答，令記者慳回大量時間，做工佬世一。

Ritchie坦言《造星V》完結後自己接洽工作，要做工又要兼顧經理人事務，由跳舞唔叻到跟Lyman及Adams同組鬥跳都應付自如，Ritchie的毅力唔使多講，他稱有困難，但還好。「ViuTV仲會畀啲提議我，有啲工作會問佢哋要點傾，開咩條件等等。」

有心理準備兩邊走
9月10日將再辦三個月內的第二個Fans Meeting，原因是首次FM加《 Summer Live》當晚未能跟Fans有更多互動，所以寵粉的他希望借今次多跟粉絲傾偈，他亦樂見戰友陸續開FM。另外，9月9日他亦會出席海洋公園舉辦的TrendyToo SPLASH活動，「如果有好嘅機會、舞台、活動，我都一定會把握，亦做好經常兩邊走嘅心理準備。」