古天后日誌｜阿爺反貪向醫藥股開刀 港股成交縮水 或再陷陰乾市

港股｜8月8日，部份時間有陽光，初時有幾陣驟雨，日間天氣酷熱。股神巴菲特旗艦巴郡續後股價創新高，帶動美股回升，道指升407點，標指升40點，納指則升85點。本來進入危險範圍嘅VIX升破17後再度回落至15.77，反映美股氣氛仍然強勁，稍有回落即見有資金入市低吸。

中概股高開低走

美國經濟較預期強勁，再有美聯儲局委員支持保持高息一段時間，但明年初有條件減息，不過美國政府財政惡化仍然令市場困擾，10年債息高企於4.08%。雖然美股表現強勁，但中概股就跟唔到美股步伐，高開低走，拖累隔晚ADR及夜期跌至19,400點水平，今日港股料再低開。

上周阿爺再推政策救市，所謂組合拳刺激經濟，又係打嘴炮，並呼籲民眾要從股市中創造財富，買股可置富。呢次嘅所謂救政策，又係流於空談，恒指上周反彈至20,381點水平後，連日高開低走，並出現三連陰，加上成交未能配合，結果又重返二萬點之下，短短三日已回吐千點，反映資金未有跟隨阿爺嘅口號，入場買股博置富，北水就繼續彈出彈入。

說好的組合拳並未見有特別，反而阿爺向醫藥股開刀，表示要打貪反腐敗，噚日醫藥股被洗倉，但總成交額則跌至不足800億元，顯然資金未肯再大量配置港股。醫藥股嘅捧場客先死得無辜，上周初阿爺仲係口口聲聲話支持自家創新藥物發展，但轉個頭又話要反貪腐，結果醫藥股威咗兩日又被血洗。

投資者或轉投美股

一而再，再而三地，北水借呢啲消息彈出彈入，人哋就早着先機短炒撈嘢，一般散戶信以為真，就後知後覺地瀨嘢，試問仲有幾多韭菜可被割，割到連根拔起，仲有邊個肯入場做點心?? 內地醫藥費高昂問題存在已久，阿爺要打貪無可厚非，但打貪前又放好消息，係要讓領導先走?? 試問咁嘅情況之下，仲邊有人肯信中港股市係一個理想嘅投資環境，捨難取易下，轉投美股甚至其他市場嘅投資者越多，中港股市缺水更趨嚴重。

相關文章：

Tesla轉盈關鍵人物突辭職 馬斯克頸痛開刀 繼任人再生懸念

港股市況｜恒指低開229點 醫藥業反腐風暴持續 相關板塊受壓 市場關注千億美債發售

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ