古天后日誌｜港股繼續向下尋支持 18800至19000支持望能守

9月5日，天晴，天氣乾燥酷熱，完全唔似已立秋。美股上周五繼續下跌，上周五非農數據好過預期，早段美股反彈，可惜後勁不繼，至中午美股已轉跌，三大指數跌逾1%收市。美股連跌三個星期，開始有些少超賣，但反彈卻有心無力，標指4000點由支持變阻力，4000暫為標指短線反彈阻力，要重上4000企穩美股先有望營造似樣反彈。

唔少企業都計劃裁員，又或減少招聘，估計未來數月非農只能在低水平打滾。另一個值得關注數據係時薪增幅保持在5.2%，高通脹令就業者唔肯減價，薪金開支未來數月難以回落，高成本仍然蠶食企業利潤。今個月開始聯儲局將加大收水力度，縮表增至950億美元，流動性減少下，美股當然借勢回調。

港股易跌難升

喺聯儲局繼續收水下，市場上美元將繼續減少，引發更多資金流回流美元區，美匯指數步步高升，新興市場資金流失更快，咁嘅情況下，新興市場發生金融危機嘅會再上升。人民幣跟歐元面對下調壓力，小心全球系統性金融風險正升溫。

港股上周表現疲弱，喺重磅股股東相繼減持下，港股易跌難升，技術上港股仍有機會向下尋底，不過恒指喺18800至19000水平嘅支持力唔錯。不過成交低迷仍然係港股反彈嘅一大障礙，雖然上周五成交額略為回升至千億元之上，但扣除恒指成份股rebalancing因素之後，其實成交未見得有回升。今個星期若然港股繼續探底之際，而成交未見回升至千億配合，即係低位仍未有資金願意入場，港股咁搞落去都幾濕滯。

古天后

(徐狄怡，證監會持牌人)