獨家丨劉青雲笑談絕密家事：屋企有蟻㗎疫情留家驚歎郭藹明點解咁叻

2022-07-28 07:00

劉青雲相隔11年再跟韋家輝導演合作電影《神探大戰》，上映未足一周票房已衝破600萬，內地票房更突破6億人民幣。兩人合作近40年，韋導欣賞青雲演繹再有新變化，青雲就讚嘆韋導的超凡創作力。疫情令電影延期上映，亦令青雲被迫「滯留屋企」1年多，意外發現郭藹明如何持家有道，他還學識處理家中大小事。另外，不愛上網的青雲貫徹低調個性，未打算開通社交平台，想見青雲只能買飛入場嘞！採訪：杜杜攝影：沈健程　髮型：Davy　YU@AdmiXHairStyling(湯怡)　化妝：木子維納Vena(湯怡)　服裝：Ralph Lauren(湯怡)　場地：尖沙咀iSQUARE英皇戲院

青雲跟韋導和湯怡拍完戲後有段時間冇見，大家難得聚舊。

青雲在《神探大戰》演的是前總督察「李俊」，本是個破案無數的神探。

韋導多次強調《神探大戰》跟2007年的《神探》沒關係，不過《神探》的「陳桂彬」和《神探大戰》的「李俊」同樣是個查案好叻，但精神異常的警察，兩個角色看似無關，卻又有淵源，韋導解釋：「07年拍《神探》時有個原型嘅『神探A』，但拍完出嚟同個原型完全唔同，我想拍嗰個故仔亦冇拍到，變咗『陳桂彬』版本嘅《神探》，咁多年我依然好鍾意冇拍到嘅故仔，今次一起步想拍返，但係好神奇，拍拍吓又變咗𠵱家《神探大戰》，『神探A』就演變咗『李俊』，雖然『陳桂彬』同『李俊』係完全唔同，但都係原型『神探A』度變出嚟。」問到原型『神探A』究竟有何特別呢？韋導就大賣關子，「我好鍾意嗰個故仔，所以唔透露得，因為會拍嘛！」

戲中有廟街槍戰，少拍動作戲的韋導，反而認為難拍有壓力，才會迫自己進步。

青雲在《神探》中，同樣飾演一個查案好叻，但「神神哋」的警察。

發現吸塵機係有水嘅

84年的TVB劇集《畫出彩虹》，韋導跟青雲初次合作，一個編一個演，再到電影圈合作無間，轉眼近40年。在韋導眼中青雲由始至終是個叻演員，還深不可測，「佢嘅演法愈嚟愈西方，好似拍緊一個西片演員咁，好難講分別，但係會feel到，睇得西片多就會知。」青雲認為韋導創作力超乎想像，「拍呢套戲時導演成日叫我快啲，同我講腎上腺，演戲演到醫學咁滯，哈哈！我未演過亦都唔會選擇咁高頻率去演，一路好奇怪點解？但我冇問，我知總係有啲嘢，最尾套戲出嚟，佢將個故事推展到嘭！好似火車咁，呢個係我想像唔到，畀我好大驚喜。」

韋導跟青雲相識共事接近40年。

青雲笑指韋導拍攝時不停提他要快，迫他的腎上腺素颷升。

《神探大戰》早在4年前已煞科，但疫情令電影延期至今才上映。青雲自言疫情令他的生活起了翻天覆地變化，1年多沒工開的日子，他發現很多以往不太留意的事情，首先是結婚24年的老婆郭藹明，原來非常持家有道，「點解你咁多嘢都做得嚟嘅？我真係唔得！」青雲坦承結婚以來，未試過對住老婆咁耐，亦令他對生活有重新體會及學習，「好得意，好似一套大悲劇入面搵到一啲好唔同嘅嘢，我以前通常都係拍戲，唔拍戲就等開工，唔開工就去咗旅行，大部份時間都唔係咁樣生活。以前基本上一日三餐都唔會喺屋企食，但𠵱家一日三餐食都唔單止，我開始發現吸塵機係有水嘅，同埋知道屋企係有蟻㗎！我真係唔係呃你，以前叫我喺屋企搵嘢係件好痛苦嘅事，我真係唔知啲嘢擺喺邊，但𠵱家真係好清楚。」

青雲想不到疫情令他拾回不少生活感覺，「演員成日演好多生活嘅嘢，但本身唔係好真正過生活。」

青雲和郭藹明疫情下戴住口罩出街，估不到一樣畀粉絲認出。

愛低調拒開社交平台

久未受訪的青雲愈講愈興奮，無諗過戴着口罩也被野生捕獲，「唔明白戴住口罩，笠埋頂帽去搭𨋢，有位女士都問我『劉青雲可唔可以影張相』哈哈！點解會知道我係？唔通件衫寫咗個名喺度？」作為演員，幪住面都被觀眾認得，係咪應該值得開心？青雲即搞笑話：「咁樣講有啲驕傲！我係比較humble嘅人，係咪開心？覺得奇怪囉！」

「劉青雲」FB Page有過百萬人like。

「劉青雲」FB Page版主不時會分享人生語錄，隨便都有近5萬like，近5千share。

一直未有社交平台的青雲，早已知道有一個不時分享人生語錄的「劉青雲」FB Page，「嗰個（帳戶）朋友都講咗唔係我，但最有趣係有人同我講，佢有個朋友有睇，就算同佢講唔係我嚟，都話唔緊要，哈哈！」青雲強調不會因徇眾要求而開社交平台，因在他的認知中演員最好低調，「演員應該唔好成日俾人見到，譬如劉青雲結咗婚又識第二個，如果佢做套戲演好男人，你信唔信吖？演員就係演戲，演完戲就唔見，廣告最好都唔好拍，淨係演戲最好，但係世界唔同咗，有啲嘢要open啲，但我都係對網上唔係太大興趣！」問他是否寧願去買餸？「買餸係件好好玩嘅事。」而作為「巿民劉先生」對於常去的九龍城街巿快將清拆，他趁機祝福檔販，「相信喺巿場入面我認識嘅人，可以搵到一個好好嘅辦法繼續生活。」