古天后日誌｜市場靜待聯儲局議息結果

6月15日，大致多雲，間中有驟雨及幾陣狂風雷暴，不穩定天氣持續。美股隔晚個別發展，道指再跌151點；標指跟納指分別跌5點及升19點。經過三個交易日急跌後，超賣後出現反彈好正常，只係大家都睇到，美股反彈力度好有限，主要係10年債息高企下，美股都唔彈得去邊。

今晚聯儲局議息，市場都等緊議息結果，目前市場已有預測今次及下月加息幅度可能去到0.75%，只係通脹高企下，究竟仲要加幾多息先可以控制通脹。聯儲局嘅通脹目標為息率要高過通帳2%，但最近公布嘅CPI為8.6%，咁究竟要加幾多息先足夠？古天后諗起都驚驚。

不過通脹主要係因為油價高企，以及供應鏈問題所造成，只要供應鏈逐步回復正常，通脹都會見頂回落，只係通脹回落速度唔夠快，CPI長期高企，似乎聯儲局都唔可以手軟，要重手加息先可以控制得住。喺加息問題困擾下，美股嚟都唔會有好日子過，因為息口上升將影響企業回報，當美債息進一步上升至4厘水平，試問仲有邊估願意投放資金去股票市場，而唔轉投被視為無風險資產嘅美債。 

重點係美股過往十年大牛市升浪，都係由高增長嘅科技帶動，低息環境下，呢類唔賺錢嘅公司，透過高槓桿，低息借貸，任性地燒銀紙去爭佔市場，谷大個市銷率。但當利息高企，市場已再唔提供平錢，燒錢成本高企，呢類企業自然站唔穩腳，估值重評下自然被大幅拋售，甚至企業本身亦無法經營落去。

美一旦陷衰退 需求自然減

雖然美國總統拜登已意識到有需要減關稅，希望藉此可以壓抑通脹輸入，只係當傷害而造成先嚟減關稅，似乎已遲咗一步。至於中國嗰一邊，減關稅係好消息，只係呢三年疫情期間，因為中國嘅鎖國政策，已逼使唔少生產線外移，已遷離嘅生產線，係唔會又搬返去中國，減關稅只會係一個短暫刺激，長線靠此拉動中國製造業嘅影響有限。同時美國經濟一旦陷入衰退，需求自然會減少，減關稅亦唔會拉動美國需求。

睇返香港呢邊，港元噚日又再觸及弱方保證，逼令金管局出手接貨，美息上升吸引美元回流美國實屬正常，人民幣疲弱下，內地想透過放水減息谷經濟難度大增，因為咁做只會進一步令資金流走，阿爺放水與否，進入兩難局面。雖然以目前銀行體系已囤積達3000億結餘，走一百幾十億嘅影響相當有限，只係美息上升下，港元保持息率不變，兩者之間息率愈拉愈闊，資金自然會繼續流向利率更吸引嘅美元，咁資金流走下，港股又可以強得去邊。所以古天后一直維持上落市睇法，一日無法解決港股缺水問題，港股都只係喺區間移動，目前移動區間約為20000至22000之間。

古天后

(徐狄怡，證監會持牌人)