古天后日誌｜港股能否守50日線為後市關鍵

6月2日，多雲，間中有幾陣驟雨，日間短暫時間有陽光，天氣炎熱。隔晚美股先升後跌，道指早段曾升282點，但無以為繼，三大指數報跌收市，道指跌176點；標指跌30點，納指跌86點。摩通行政總裁戴蒙周三出席一個會議時，警告市場做好迎接「颶風」嘅準備，因為經濟面對嘅係一系列前所未有嘅挑戰，包括貨幣政策量化緊縮及烏克蘭衝突。

而踏入6月，正正係聯儲局開始正式縮表，今個月開始縮表數量將按月增加，而聯儲局官員亦已多次強調，6月及7月議息會議，每次加息0.5厘以抑壓通脹係恰當措施，10年期債息亦從2.75%反彈至2.9%水平之上。債息回升拖累美股下跌，近日美股反覆嘅表現，正正受到債息上落影響。

雖然經濟數據未有顯示美國經濟步入衰退，市場需求仍然強勁，不過原材料供應緊張，以及運輸及燃料成本上升，令企業成本急增，拖累毛利率收縮，直接影響美企盈利表現。若然上述問題遲遲未能解決，企業盈利惡化下，美股亦只好繼續向下尋底。

內地基金消耗唔少購買力

至於A股表現平平，雖然阿爺多次出招救市，無奈喺市場缺乏資金入場支持下，A股能守穩已算唔錯，都好難寄望有好大力度向上突破。內地公私募基金嘅持倉情況剛好跟美股相反，美國嘅基金現金水平偏高，但內地基金喺過去兩三個月抄底買貨，已消耗唔少購買力，尤其內地過去兩個月疫情反覆，封城進一步影響經濟活動，令流入股市或買入基金嘅資金更為緊縮，喺無新資金流入下，A股步入有波幅，無升幅狀態。任憑阿爺官媒點樣大嗌A股低買，A股都係呆呆滯滯。

港股自上月19800點水平開胎反彈至接近21500點水平，上升動力大減，噚日港股高位見回吐，即使市場唔少樂觀聲音，指呢一轉港股反彈可高見22000甚至4月高位22500水平，古天后仍堅持港股仍處於上落市格局嘅睇法，暫時恒指受制於21500水平，關鍵係恒指能否守住21000水平，並企穩於50日線(20959)之上，若然恒指重返50日線之下，再考驗10日線(20715)及20日線(20400)亦唔會覺得意外。

古天后

(徐狄怡，證監會持牌人)